Azaroko lehenbiziko asteburuan egindako euriak uholdeak, lur-eroriak eta bertzelako kalteak eragin zituen eskualdean. Eta hala, Oronoz-Mugairiko suhiltzaile profesionalek eta Bera, Lesaka, Goizueta eta Leitzako boluntarioek lana gogotik egin behar izan zuten.
Leitzaldean
Leitzan, Landabeikoa inguruan gainezka egin zuen Leitzaran errekak eta baratzeak hartu zituen. Sarrio lantegian ere ura sartu zen, baita bertze lokal eta sotoetan ere. Leitzarako sarbidea ere itxi egin behar izan zuten.
Goizueta, Leitza eta Hernanirekin lotzen duen NA-4150 errepidea ere itxi egin zuten, baita NA-4014 errepidea ere Areso parean, urak gainezka egin eta hainbat putzu sortu zituelako. Leitzan, azkenean, ez zuen inork bere etxetik atera behar izan, baina badaezpada Udalak Musunzar ostatuan gaua emateko aukera eman zien bizilagunei.
Baztan-Bidasoa ibaia
Bidasoa ibaiak bere ibilbide osoan hartu zuen altuera kontuan hartuz, alerta gorrian izan zen. Endarlatsan, erraterako, zazpi metroko altuera gainditu zuen. Elbete, Arraioz eta Elizondon uholdeak eragin zituen euriak, karrikak, garajeak, dendak eta sotoak hartu baitzituen urak. Ibaia Giltxaurdi zubiaren gainetik pasatu zen Elizondon eta Jaime Urrutia karrikan putzu handia egin zen. Belateko errepide zaharra ere itxi egin zen, baita N-121-A errepidetik Lesakarako sarbidea eta Etxalarko Benta eta Igantziko Benta arteko zatia ere. Gauza bera gertatu zen Oronoz eta Otsondo eta Orabidea lotzen dituen NA-4453 errepidearekin eta Etxalartik Lizarietarako NA-4400 errepidearekin.
Urdazuri aldea
Euri aunitzekin Urdazuri ibaiak gainezka egitean, Senpere ere kaltetua izan ohi da baina aldi honetan, ohi baino kalte ttikiagoa izan da, seguruenik Luberriako urtegiak ur aunitz atxiki zuelako.
Litro metro koadroko
Gorramendin metro koadroko 241,11 litro bildu ziren azaroko lehenbiziko asteburuan eta bezperako haizeak 197 kilometro orduko abiadura hartu zuen. Aranon metroko koadroko 290,1 litro bildu ziren; Areson 212,5; Goizuetan 190; Amaiurren 171,4 eta Lesakan 155 litro.