Bai Euskarari Ziurtagiria eskuratu duten Malerrekako 40 komertzio, enpresa eta entitateri ziurtagiria banatzeko ekitaldia eginen da azaroaren 25ean, ortziral arratseko 20:00etan Malerrekako Mankomunitatearen egoitza berrian, Doneztebeko Zazpigurutze karrikaren bigarrenean.
Euskararekiko konpromisoaren bidean egiten ari diren ahalegina saritu eta jende aitzinean agertzeko unea da, horretarako probestuko dute ekitaldi hau. Hasteko Patxi Mariezkurrena Malerrekako Euskara Batzordeko burua, Alberto San Miguel Mankomunitateko lehendakaria eta Arkaitz Illarramendi Ziurtagirien Elkarteko ordezkaria mintzatuko dira, segidan, ziurtagiriak banatuko dituzte. Partehartzaileen argazkia atera ondotik mokadutxo bat dastatzeko aukera izanen da.