Hasieran onartu baino subentzio ttikiagoa jasoko dute euskarazko hedabideek

Euskarabideak hasiera batean onartua zue­na baino dirulagun­tza ttikiagoa emanen die Nafarroako euskarazko hedabideei, berriz ere mu­rrizketak ezarri baititu.

Irailaren 7an Nafa­rroako Gobernuak aurtengo aurrekontuetan 327,25 milioi euroko gastu mu­rrizketa eginen zuela jakinarazi zuen, aurrekontuaren egonkortasuna bermatzeko izanen zela erranez. Nafarroako euskarazko hedabideek eta Topaguneak salatu egin dute bertze behin ere murrizketak egin direla eta zera azaldu dute: «eskarmentuak era­ku­­tsi digu halakoetan eus­karari zuzendutako diru-sailak ez direla onik atera­tzen. Iragarpena jakinara­zi zenetik zenbai­tetan Euskarabideara informazio eske jo genuen. Ez zi­guten ezer eran­tzun. Edo bai, esleitutako diru­laguntza kobra­tzeko dokumentazioa aurkezteko epea aitzineratu zutela».

Nafarroako Gobernuaren murrizketek gizarteko hainbat alor ukitu dituzte, baita euskarazko hedabideak ere. Maximino Gomez Se­rra­no Euskarabideko zu­zendari kudeatzai­leak­ azaldu duenez, Nafa­rroako Gobernuak au­rrekontua «doitzeko» hartutako erabakiak «Eus­kararen gaineko programak komunikabi­deetan» kontu-sailari ere eragin dio. Urriaren 31ra arte justifikatutako gastuak ordaintzeko adina diru baduela adierazi du Euskarabideak, baina urteko azken bi hilabeetarako aurreikusia zuen dirurik ez omen du.

Euskarabideak esleitutako dirulaguntzak bi epetan ordaintzen ditu. Dirulaguntzaren erdia jakinarazpenarekin batera ematen du, eta ber­tze erdia gastua justifikatu ondotik. Hasierako zatia emana du baina oraindik egiteko dagoen bigarren ordainketan murrizketa eginen du. Honela, bigarren zatirako aurreikusia zegoen zatian, %34ko mu­rriz­ke­ta izanen dute Beleixe irra­tiak, Mailope aldizkariak eta TTIPI-TTAPA aldizkariak; Esan-Erran­ irra­tiak %37ko mu­rriz­keta izanen du, bai­ta Pulunpe aldizkariak ere; Guaixe aldizkariari %20ko murrizketa egin diote dirulaguntza­ren­ bigarren zatian eta Xo­rro­xin irratiari %33­koa. Mu­rrizketa hauek bigarren zatiari dagoz­kionak dira. TTIPI-TTAPAren kasuan, osotara, hasieran onartutakoarekin aldera­tuz, %16,66­koa izan da murrizketa.

Horren harira, «mu­rrizketa horiek guztiek euskarazko hedabi­deok­ aurretik jasaten ari garen egoera ekonomiko larria areagotzen dute­la» azpimarratu dute Topaguneak eta Nafarroako euska­razko hedabideek eta gaineratu dute, «hedabi­deok esleitutako diru kopuruak kontuan izanik egin ditugula urte guztiko­ au­rrei­kuspenak. Orain, bat-batean, zati bat ken­tzeak lehendik ahula den gure ekonomia-osa­suna kolokan uzten du».

Hedabideak euskararen ekosistema «mantentzeko, indartzeko eta biziberritzeko ezinber­tze­ko elementu bat» direla iritzita, Euskarabideari eta haren arduradun politikoei hori ahalbideratzeko, babesteko lan egitea exijitu diote Topaguneak eta Nafarroako euskarazko hedabideek. «Horregatik, esleitutako dirulagun­tza bere osotasunean ema­tea exijitzen dugu», diote. «Aldi berean, sektoreko aktoreekin bildu, egoera aztertu eta etorkizunerako hitzarmen bat lantzea eskatzen dugu, Nafarroako Parlamentuak 2009an eskatu zuen moduan».