Asteburuan hainbat kalte eragin zuten euriak eta uholdeek gure inguruko herrietan. Azaroaren 8an, astearte eguerdian kalte horietako batzuk ikuskatzera Baztanera etorri zen Jose Luis Izco, Nafarroako Gobernuko Toki Administrazio departamentuko zuzendari nagusia, teknikari baten laguntzarekin. Kalteak ez direla hondamendi eremu izendatzeko hainakoak aipatu du Izcok.
Asteartean Baztanen kaltetutako pistak ikusten izan zen zuzendari nagusia, Garbiñe Elizegi Baztango alkatea, Mikel Ortega zinegotzia eta menditako guardak lagun zituela. Erratzun, Xabier Ospital alkatearekin bat egin eta Untxide auzora hurbildu ziren. Aranea errekak pista hondatu du eta bortz baserritara ailegatzea ezinezkoa da. Gorostapolon ere, hainbat kalte eragin zituen urak eta hori dela eta laguntza eskatu zuen Baztango alkateak.
Arratsaldean Baztango udal ordezkariak ez ezik, Lesaka, Leitza, Goizueta eta Zugarramurdikoak ere bildu ziren Jose Luis Izcorekin. Izan ere, 2009ko uholdeen ondorioz dirulaguntzak izanen zirela hitz eman zen Nafarroako Gobernutik, baina ez ziren udaletxetara ailegatu. Hori ez errepikatzea espero dute udal ordezkariek, baina errandakoa, Nafarroako Gobernuak ez du hondamendi eremu izendatuko eskualdea.