Nafarroako Gobernuko Sustapen Sailak eta Udalak Elizondoko saihesbiderako materiala ateratzeko Irurita-Oharriz inguruko lur sail baten desjabetze hitzarmena sinatu zuten urriaren 17an. Sail honek lehendik desjabetua zegoen bertze bat osatzen du.
Espropiazio honen inguruan, NaBaik adierazi du «Bilduk eta Ezkerrak porrotak garaipenak bezala saltzen dituztela» eta lehengo korporazioak lur horien truke lortu zituen kontrapartidak non gelditu diren galdetu du.
NaBairen arabera, aitzineko Udal Gobernuak lur berdinen okupazioa negoziatu zuen, eta trukean hiru obra lortu ziren: Elbeteko hilerrirako bidea asfaltatzea, Lekarozko frontoitik baserrietarako bidea asfaltatzea eta Iruritako hiltegitik hurbil dauden etxebizitzetarako bidea asfaltatzea. NaBaik dio, «Bildu, Ezkerra eta zenbait herrietako alkateren estremismoaren ondorioz» galdu direla kontrapartidak eta hori «ezkutuan» gorde izana ere leporatu dio Udal Gobernuari.
«Derrigorrezko desjabetzea akitu da, Bilduk eta Ezkerrak onartu egin behar izan dute eta hiru kontrapartidak galdu egin dira». Horrela laburbildu du NaBaik.
Salaketa horiei honela erantzun die Udal Gobernuak: «NaBairen eskumen eza nabarmena, Udala egoera kaotiko batean utzi duen aitzineko urteetako bailararen kudeaketaren autokritika egiteko erabateko ezintasuna berriz ere albistea da Elizondoko saihesbideari buruzko oharrean».
Berriz ere NaBai berandu ailegatu dela eta ez dela enteratzen dio Udal Gobernuak eta «oharrean aipatzen duten ebazpena, non aitzineko alkateak Oharrizko lur komunal baten ustiaketa baimendu zuen, Batzar Nagusiaren erabakitzeko ahalmenaren usurpazio nabarmena» izan zela dio. Orain, ebazpen horren inguruko kontrapartidak aipatzen direnean, «NaBairen oharraz aparte, inon ez da akordio horren berririk eta kontseilari berriak ere ez du aitortzen. Aldiz, aitzineko Udalaren jarduerak bai baimendu zuela enpresak materiala doan ateratzea», dio gobernu taldeak.
Orain arte, Oharrizko harrobiagatik «sos bakar bat ere ez» dela sartu Udalean ere gaineratu du Udal Gobernuak, eta «urriaren 17an sinatu zen erabakian, alde batetik, eskumena duen organoaren onarpena du, hau da, Batzar Nagusiarena eta gainera, Udalak nahitaezko desjabetzarengatik tasatutako prezioa kobratzeko aukera emanen du, eta honetakoan bai, idatzita dago».
Lekarozko alkatearen oharra
Jesus Angel Garcia Lekarozko alkateak ere oharra kaleratu du. Dioenez, «otsailean Oharrizko auzokideek idatzi bat sinatuta eman zidaten, harrobiaren leherketek etxe batzuetan eragiten ziren kalteak salatuz. Idatzia sinatu eta udaletxeko erregistroan sartu nuen, informazioa eskatu bidenabar». Martxoan herrietako alkateek gaiaz solasteko eskatu omen zuten, eta «NaBaiko zinegotziek trabak jarri zituztela» azaldu du.
Gobernuarekin egindako bileran, herrietako alkateek orain NaBaik aipatzen dituen kontrapartidak eskatu zituztela argitu du Lekarozko alkateak: «Gobernukoek ez zuten ez baietz, ez ezetz erran eta akordioren batera ailegatuz gero, idatzizkoa izanen zela argitu zuten. Idazki hura gaur egun ez da existitzen». Gisa berean, orduko alkateari Herri Lan Zuzendariarekin bilera eskatu omen zion Garciak, Lekarozen saihesbidea gurutzatzeko oinezkoendako biderik ez zegoela-eta, zerbait egiteko. «Alkateak bilerarik eskatu ez, eta nire aldetik eskatu nuen. Apirilaren 29an izan zen; Gobernuak ez duela konpentsatzen erantzun zuen, desjabetu baizik». NaBaik lortu zituela dioen kontrapartidak non dauden galdetu du Garciak.