240 lagun inguru bildu ditu aurten zortzigarrenez egin den Urriruko Bestako aretze jateak

Nahiz eta eguraldi kax­karrarekin hasi urriaren 8ko eguna, Beintza-Labaienen giro ederra izan zen egunez zein gauez.

Goizean, Beintzako ostalariek 22. urtemuga ospatzeko hainbat ekital­di prestatu zituzten: 11:00 aldera bertako nahiz kanpoko jendea he­rrira hurbiltzen joan zen. Aterpea berriturik ikusteko aukera izan genuen, baita es­treinatu be­rri zuten rokodromoa ere. Saldiasko talogilea plazan egon zen nahi zuenak taloa jateko eta ondoko postuan edariak eskaini ziren. Plazaren ber­tze aldean, mahai­ bat haurrendako ma­rraz­kiekin, eta bertan, ume eta heldu margo­tzen aritu ziren, gero paretan egindako lanak itxe­kiz.

Txalaparta jotzen ere bi lagun aritu ziren, eta he­rri­ko jendeak ere ikasteko eta probatzeko aukera izan zuen.

Sorpresa prestatu ziguten hurbildu ginen guz­tioi, izan ere, Soriatik eto­rritako taldeak motoze­rraz egurrarekin irudi­txoak egin bai­tzituzten. Ikusmin haundia sortu zuten egindako lanekin, zehaztasun haundiarekin aritu bai­tziren.

Arratsaldean gehiago

Arratsaldean, aizkora­ apustua izan zen he­rri­ko bi hirukoteren artean: alde batetik, Etxebe­rria anaiak eta Peio Telle­txea eta bertzalde, Jose Luis Telletxea, Jacinto Etxe­konanea eta Xabier Mindegia. Hamar korte­ko lana izan zuten aizkolariek. Hasieratik azkeneko momentura arte berdinduak egon ziren arren, Tito­, Miguel Angel­ eta Peiok­ irabazi zuten.

Gauean, 240 pertsona bat bildu ziren afaltze­ra. Urtero bezala, salda beroarekin hasi zen afaria eta ondotik, Rebe­kak bere lehenbiziko dan­tza saioa eskaini zuen jendearen ikusmina piztuz. Entsalada eta haragia ausarki izan zen, eta azken egunetan txartel aunitz saldu arren, jendea aseta gelditu zen. Aipatzekoa da, Jaimek eta Juan­txok erretako 180 kiloko are­tzea bikaina zegoela. Pos­trerako gazta eta irasagarra jan ziren, Iruñeko Adasha taldeko Rebekaren oriental-­fusio dantza erritmoan. Rebekaren saio ikusgarriak eta Fran­txix­ko­ren akordeoi soinuak karpan bildutako jendea girotu zuten. Dantzaldiak giro ede­rrean 04:30 aldera arte iraun zuen.

Ittur-Ondo elkarteko batzordekideez gain, hain­bat laguntzaile izan ziren Urriruko Besta au­rrera ateratzeko lanetan. Antolatzaileak pozik daude egindako lanak emai­tza ona izan duelako zor­tziga­rren urtez.