800.000 euroko aurrekontuarekin, aste honetan hasi dira Bidasoko bide berdea egokitzeko lanekin. Gastuaren %65 (520.000 euro) Europar Batasuneko FEDER funtsak finantzatuko du eta gainerakoa (280.000 euro) Nafarroako Gobernuak.
Partidei dagokienez, garrantzitsuena N-121-A errepidearen azpitik pasako den lurpeko pasabidea egitea izanen da; 500.000 euroko kostua baitu. Pasabide hori Alkaiaga inguruan eginen da. Tunelaren zola, hango argiak eta bideko seinaleak ere egokituko dira. Argia egokitzeko lanak, zehazki, aste honetan hastekoak dira. Aurreikusitakoaren arabera, obrak zortzi hilabetetan bukatuko dira. Bide berde hori Legasatik Endarlatsaraino doa (35 kilometro) Nafarroan. Hala ere, lanak bukatzen direnean, Legasatik Hondarribiraino (Gipuzkoa) joan ahal izanen da bizikletaz.
Euroveloren barne
Ibilbide hori Eurovelo 1 proiektuaren zati da, Europa alde batetik bertzera zeharkatuko duten bizikleten hamabi ibilbideetatik lehenbizikoa, hain zuzen. Bertizko Produktu Turistikoak Garatzeko Plan Estrategikoaren produktu nagusia da.
Hori izan zuten hizpide, irailaren 30ean Juan Luis Sanchez de Muniain Kultura, Turismoko eta Erakunde Harremanetako kontseilariak Baztanera egindako bisitan. Eskualdeko agintariekin eta turismoaren sektoreko eragileekin bildu zen egun horretan.
Bilera horietatik lehena Bertizko Turismo Partzuergoko arduradunekin egin zuen, eta aipatutako proiektua aztertu zuten. Kontseilariarekin eta Carlos Erce Turismo eta Merkataritzako zuzendari nagusiarekin batera, Bertizko Turismo Partzuergoko hainbat kidek hartu zuten parte, tartean, Izakun Goñi kudeatzaileak, Antonio Erregerena presidenteordeak, Arantza Zubieta idazkariak eta Mari Jose Iparragirre administrazio kontseiluko ordezkariak.
Eskualdeko inguru turistikoetara bisita
Egun berean, kontseilaria Iruritako Jauregia Dorretxera ere joan zen, baita Jorge Oteiza Museo Etnografikoa eta bertan dagoen Jabier Zigaren bilduma ikustera ere, eta hemen Baztango udal ordezkariek egin zieten harrera. Ondotik, kontseilariak Arizkungo Señorio de Ursua hotela bisitatu zuen.
Bilerak alkateekin
Santiago Villares Urdazubiko alkatearekin ere egin zuen bilera kontseilariak. Alkateak bisitariak gidatu zituen Salbatore monasterioa, herriko errota zaharra eta Ikaburuko lezea ikusteko ibilbidean.
Jesus Agerre Zugarramurdiko alkatearekin ere elkartu ziren, herriko leku turistikoak diren Sorginen Museoa eta lezea ikusteko.