Baztan, Bortziriak, Malerreka, Urdazubi, Zugarramurdi eta Nafarroako eta Gipuzkoako bertze tokietako kideak biltzen dituen erretiratuen taldea da Goiz Mendi, eta duela gutti, hirugarren aldiz bukatu du Done Jakue Bidea, eta bertzeetan ez bezala, kostaldetik.
Goiz Mendi taldeko kideak 1999an hasi ziren lehendabiziko harat-honatak egiten Arkupeak Jubilatuen Elkartearekin eta Done Jakue Bidearen Baztango zatia eta Sakanatik Arabako mugara bitarteko bidea ere egin zuten. Ondotik, hamalau lagunek Donibane Garazitik (Nafarroa Beherea) abiatuta ere egin zuten Done Jakue Bidea.
Esperientziarekin pozik, berriz egitea erabaki zuten eta 2006an Iparraldeko bidea aukeratu zuten.
Joan den irailaren 19an Galiziako mugatik ohiko bidearekin bat egiten duen Arzua bitarteko azken sei etapak egin zituzten. Eta helmugara ailegatuta, irailaren 24an Santiagoko katedrala bisitatzeko aukera izan zuten, baita Galiziako jakiak dastatzeko modua ere, tartean olagarroa. Oinez ibiltzeaz gain, turismo pixka bat egiteko aprobetxatu zuten hango egonaldia.
Laburbilduz, ibilbidearen edertasuna nabarmendu dute Goiz Mendikoek, baina gorabehera askokoa dela ere esan dute, ohiko ibilbidea baino gogorragoa delako. Eta Santander eta Asturias aldean sobera ongi seinalizatua ez dagoela ere adierazi dute, eta aterpe gutti dagoela.