2000. urtean irabazi zuen Maika Ariztegi iturendarrak lehen aldiz Euskal Herriko koxkor biltze txapelketa. 2004ean ez zen aurkeztu, baina gainerako urte guzietan berak jantzi du txapela. Urriaren 9an hamekagarrena jantzi zuen Asteasun (Gipuzkoa).
Iturendarrak 7 minutu eta 24 segundu behar izan zituen lana akitzeko, bigarren sailkatu zen Josune Gorostidik baino 36 segundu guttiago (8:00). Hirugarren Naiara Ferrán arabarra izan zen (8:07) eta hirugarren Itxaso Hernandez arabarra (8:23).
Maika Ariztegik joan den urteko txapelketan egin zuen markarik onena, 7 minutu eta 17 segundu. Beraz, errekorretik 7 segundura gelditu da aurten, baina kontuan hartu behar da hiru saskiratze huts egin zituela eta arazo horregatik segundu batzuk galdu zituen. Dena den, 2005ean Uharte Arakilen jokatu zen txapelketan 7 minutu eta 11 segundutan ere bildu zituen Ariztegik 50 koxkorrak, baina plaza ttikixeagoa zenez, ez zen errekorra homologatu.