Talo Egunaren barne, irailaren 11n jokatu zen Leitzan Euskal Herriko Aizkolari Gazteen Txapelketa eta bortz aizkolari aritu ziren nor baino nor. Guztien artean herriko semea den Eneko Saralegi nagusitu zen (18 urte). 45 ontzako lau enbor eta bi kanaerdiko moztu behar izan zituzten aizkolariek eta Saralegik 15 minutu behar izan zituen lanak bukatzeko (15:00.64). Proba guztietan gailendu zen leitzarra.
Eneko Otaño beizamarra (Gipuzkoa, 17 urte) gelditu zen bigarren 16:23.59ko denbora egin ondotik eta Eloy Corchero araiarrak (Araba, 18 urte) osatu zuen podiuma (17:21.62).
Laugarren postua ere Leitzan gelditu zen: Julen Olano 17 urteko gaztea izan zen laugarren sailkatua, 21:43.66ko denbora eginez. Bosgarren postua ere eskualdeko aizkolariarentzat izan zen, bortz aizkolarien artean gazteenarentzat, hain zuzen: Joxean Etxeberria zigarrak 15 urte bertzerik ez ditu eta 24:48.08ko denbora eginez bukatu zituen lanak.