Soilik puntu bateko aldeaz irabazi zion Gipuzkoak Nafarroa Garaiari irailaren 10ean Legution (Araba) jokatu den XXIII. Zazpi Herrialden Arteko Txapelketan, baina Bizkaiak ere txapelketa aipagarria egin zuen, eta hirurek hagitz lehia txalogarria eskaini zuten.
Hamar urte igaro dira Gipuzkoak txapela berreskuratu ahal izateko, azken zazpi urteotan, bertzeak bertze, Nafarroa Garaia gailendu delako erabat.
Gipuzkoa erregularra
Gipuzkoa hiru kiroletan nagusitu zen: koxkor-biltzen, harri-jasotzen eta txinga-eramaten. Azken bi kiroletan espero zen gipuzkoarren garaipena, Aimar Irigoienek eta Juanjoxe Agirregabiriak irabaztea pronostikoetan sartzen baitzen, baina Eneko Garmendiak lehen aldiz irabazi zion Fernando Etxegarai beratarrari koxkorrekin. Gipuzkoak erregulartasun handia izan zuen. Hiru kirol horietako garaipenaz gain, ingude-jasotzen, orga jokoan, aizkoran eta sokatiran lortu baitzuten gipuzkoarrek bigarren sailkatzea. Hirugarren postua, berriz, lasto-jasotzen, zaku-eramate lasterketan eta arpanean lortu zuten.
Nafarroako taldeari dagokionez, lau kiroletan lortu zuen garaipena: Joakin Aioroa iturendarrak ingude altxatzen, Berriozarko taldeak zakuak eramaten, Ultzamako Barberena anaiek trontzan eta Floren Nazabalek aizkoran.
Koxkor-biltzen Fernando Etxegarai beratarra bigarren izan zen, txinga eramaten Mielanjel Sukuntza leitzarra eta lasto altxatzen Iñaki Bereau igantziarra bezala. Sokatiran hirugarren izan zen Amaiur. Hemen, ustekabean Lapurdik eraman zituen zazpi puntuak. Harri jasotzen ere hirugarren izan zen Josetxo Urrutia leitzarra. Azkenik, orga jokoan Simon Thomas Callaghan aritu zen Nafarroa ordezkatzen eta bosgarren sailkatu zen.
SAILKAPENA
1. Gipuzkoa (60 puntu)
2. Nafarroa (59 puntu)
3. Bizkaia (53 puntu)
4. Araba (35 puntu)
5. Lapurdi (34 puntu)
6. Nafarroa Beherea (20 puntu)