Fabian Thomé Senpereko pilota eskolan aritu zen haurra zelarik, baina pilota plazak laster utzi zituen bere zaletasuna dantza baita. Gazte gaztea zelarik Catalina Gomezek Donibane Lohizunen duen flamenko eskolan sartu zen. Han ikasi zituen bere lehen urratsak eta berehala zerbait berezi sumatzen zitzaion taula gainerat hupatzen zelarik dohain haundia eta alderdia baitzuen ttiki ttikitik.
Hemezortzi urtetan Ipar Euskal Herria utzi zuen eta Madrilgo kontserbatorioan sartu zen dantzan aritzeko zuen maila hobetzeko xedearekin. Hantxe ikasten aritu zen hiru urtez eta geroztik bide egin du 30 urteko lapurtarrak. Bi urtez Joaquin Cortes kordobarraren konpainian aritu da eta geroago lehen dantzaria izan da Rafael Amargo granadarraren taldean. Joan den urtarrilean aspaldiko ametsa egia bihurtu zuen bere konpainia FT sortu baitzuen Espainiako hiriburuan. Talde honekin apailatu du Desde el sofá Espainiako ohiko dantza, flamenkoa, dantza modernoa eta antzerkia nahasten dituen ikusgarria.
Taula gainean besaulki bat dago eta horren inguruan ari da dantzan. Eguneroko biziko historia arruntak irudikatzen ditu. Maiatzean estrenatu zen ikusgarri hau Madrilen eta orain bidez bide dabil Fabian Thomé. Berriki, Miarritzeko Colisé aretoa bete zuen Maitaldia nazioarteko dantza festibalaren karietarat. Lehen aldia da etxean dantzatzen zuela profesional gisa. «15 urte geroago profesional gisa itzuli naiz», dio pozik. TTIPI TAPAri adierazi dioenez «ohore haundia» izan da Lapurdi kostaldean dantzatzea aspaldiko partez. Bertan egon ziren orain gutitan ikusten dituen bere familia, lagunak eta lehenagoko dantzari adiskideak. Colisé jendez mukuru betea izan zen nehoiz ez bezala. «Niretzat dantza dena da, nire bizia da, nire zaletasuna, hari esker jeikitzen naiz goizero». Thomé biziki zorrotza da zuzentzen duen konpainiako kideekin baina oraino zorrotzagoa da bere buruarekin. Zorroztasun horri esker eta milaka oreneko lanarekin lortu du dantzatzeko molde paregabea. Taula gainean sorpresa bat baino gehiago eskaintzen du flamenkoa eta Léo Férreren frantsesezko kantuak lotuz, bertzeak bertze.
Orain herriz herri ibiliko da Desde el sofá aurkezteko Frantzian eta Belgikan barna eta baita Donostian eta Gasteizen ere.