Irailaren 8ko goizean botatako txupinazoarekin hasi ziren Lokariko Amabirjinaren jaiak. Ondoren txistulariekin kalejira eta Meza Nagusia izan ziren. Aizkora apustua ere egun berean egin zen, eta Eratsun eta Larretxea, Rekondo eta Saralegiren aurka aritu ziren. Garaipena leitzarrentzat izan zen.
Arratsaldean bi pilota partida jokatu ziren eta etxeko pilotariak, Bendoirok, ezin izan zuen markagailuan 22ra ailegatu. Ondoren, beste urte batez, Modestok jarri zituen herritarrak dantzan. Gauean, aurreko urteko ohiturari segituz, 40 emakumezko elkartu ziren afaldu eta txutxumutxuekin gozatzeko.
Ostiralarekin, mus txapelketa jokatu zen eta Pello Juanena eta Patxiku Retegik osatutako bikoteak irabazi zuen. Tolare eta Benjamin azpitxapeldun gelditu ziren.
Larunbatarekin egin zen zikiro jatean 94 lagun elkartu ziren, eta Anjel herriko akordeoilaria giroa alaitzeaz arduratu zen. Nabarmentzekoa da aurretik mahaiak paratzen eta ondoren zerbitzatzen aritu zirenen lana.
Doneztebeko Erreka Dantza Taldearen emanaldia ere ikustekoa izan zen, eta jendeak erantzun ona eman zuen, baita gogotik txalotu ere. Ondoren, Obanauke taldearekin dantzaldia izan zen goizaldera arte.
Igande arratsaldearekin beste bi pilota partida jokatu ziren eta festak akitzeko Modesto akordeoilariak dantzaldia eskaini zuen.
Musutruk aritzen diren bi lagunen lana ere nabarmentzekoa da: Ezkurrako Cipriano aizkora apusturako egurra jartzeaz arduratu zen eta Julianek pilota partidetarako materiala prestatu zuen. Tantuak kontatzeko tresna aski modernoa ere jarri zuen lurrean, eskolako tiza edo klera eta guzti.
Mariezkurrena familiak ere aipamen berezia merezi du. Izan ere, etxeko bajera herritar guztientzat zabaldu zuen, otorduak eta edariak eskaini eta mus txapelketa egiteko. Arretaz eta atsegintasunez zerbitzatu zuten.
Eratsungo festetara kanpotik joaten direnei arreta pizten diena, hala ere, pilota partidak frontoi zaharrean jokatzen direla da, nahiz eta frontis altuegia eta ezkerreko pareta garai bateko elizaren paretari itsatsia duen, eta hiru leihorekin, gainera. Duela urte batzuk inauguratu zen frontoi estalia, baina herritarrek zaharra nahiago dute. Hartara, publikoa kantxatik hurbilago gelditzen delako eta jendeak etxeko balkoi eta leihoetatik partidak ikusten ahal dituelako.