Hainbat nobedade izanen ditu Ittur-Ondo elkarteak antolatuta urriaren 8an eginen den Urriruko Bestak

Urriaren 8a egun berezia izanen da. Alde batetik, Ittur-Ondo elkarteak Urriruko Besta antolatu du aurten zortziga­rren aldiz eta gainera, berrikun­tza ba­tzuk ere prestatu ditu. Baina egun ho­rretan Bein­tzako ostatu-aterpetxeak bere 22. urteurrena ere ospatuko du eta horren harira, Bein­tzako ostalariek aterpe­txean egin diren haundi­tze lanak ikustera joate­ko gonbidapena luzatu dute, baita goizean eginen diren ekitaldie­tan parte har­tzeko ere. Ikusi iragarkia.

Arratsaldean gehiago  

18:00etatik aitzinera Zubietako Joaldunak karrikaz-karrika ibiliko dira eta 19:00­etan herriko aizkolarien saioa izanen da. Ondotik, 06:00etan Jaime Mindegia pres­ta­tzen hasitako afariaren txanda izanen da. Kanalean 200 bat kilo pisa­tzen dituen are­tzea­ pres­­ta­­tuko da, eta 21:00­erako prest egon beharko du. Aurten ere kar­pa barruan izanen da afaria eta guztira 200 lagunendako izanen da.

Afaltzeko orduan zozketa bat eginen da; Nafarroako produktuen zare eder bat.

Herritar gehienak ez ezik, inguruko herrietatik ere jende andana hurbilduko da egun horretan Beintza-Labaienera. Aurten, gainera, erakustaldi berezia izanen da afaltzeko tenorean. Izan ere, sabeldantza giroan afalduko dugu bertara inguratzen garenok. Zenotzeko Rebeka Ericek eta Iruñeko Adasha dan­tza taldeko kideak bere sabeldantza mugimenduekin alaituko dute are­tze jatea. Ikuskizun polit­ eta ezberdin honetan par­te hartzera gonbida­tzen zaituzte Ittur-Ondok.

Azkenik, Iruritako Frantxixko akordeoilariarekin dantzaldia izanen da goizaldera arte.

Bai egun horretan bai aurretik laguntzen ariko diren elkarteko kide eta herritarrei ere bere esker ona azaldu nahi izan die elkarteko batzordeak.

Afarirako txartelak elkartean, he­rriko ostatuetan eta Baleztena dendan izanen dira salgai, urriaren 2ra arte. Eskertu­ko da txartelak epe ba­rre­nean erostea, antola­tzaileek jakin dezaten zenbat jende bilduko den.

Patxaran dastaketa

Ittur-Ondo elkarteak larunbat honetan, urriak 1, afaria antolatu du pa­txaran dastaketaren ai­tzakiarekin. Edozein ingu­ratzen ahal da afal­tzera egun horre­tan; kontuan hartu dastaketa afal ai­tzinean izanen dela.