Ipar Euskal Herrian gehien entzuten den irratiaren uhinak euskalduntzen ditu Anddek asteburu guziz eguerditan. Joan den maiatzean aintziratik aritu zen zuzenean Herri Urrats bestaren karietarat, amaren sortetxetik hurbil. Buru gainean kaskoak zituela Peio Oçafrain uztariztar gazteari elgarrizketa egin zion Zelanda Berrirat egin zuen bidaiaz.
Andde Irosbehere irratilariak 24 urte bertzerik ez ditu baina denbora laburrean Iparraldean entzule gehien duen komunikabideko ahots saihestezina bilakatu da. Duela sei urte Gure Irratian bizi izan zuen lehen esperientzia arrunt gustukoa izan baitzuen ildo horretan segitzea deliberatu zuen. Bere boza maiz entzuten da orain Baionatik zabaltzen den Urdin Euskal Herri Irrati publikoan.
• Larresoron bizi zara baina gutik dakiten lotura berezia duzu Senpererekin...
Nire ama Bernadette senpertarra da, Zamora familiako zortzi anaia-arrebetarik azkena, Auxtin Zamora olerkariaren arreba da, beraz. Larresoron pasatu dut haurtzaro guzia, baina 17 urte arte kasik igande guziz joaten ginen Altzibururat, amatxiren ikustera. Orroit naiz kondatzen zizkidan ixtorioetaz Senpereko herriari buruz. Orain guttiago joaten naiz baina badakit nire erroak han direla.
• Zergatik nahi izan zenuen irratilaria izan?
Ttipitatik irratiak erakarri nau. Etxean irratia entzuten ginuen maiz. Orroit naiz ttikitan Gure Irratiko jokoetan parte hartzen ausartzen nintzela. Irratiak baditu berezitasun interesgarriak : badu prentsa idatziak ez duen bizitasuna, soinua; irudirik ez da baina entzuleak bere irudimena pizten ahal du. Beste gauza ainitzek ere erakartzen naute lan hortan: jendeekiko hurbiltasuna, bai antenan bai eta erreportajeen egiteko momentuan ere; jendeen informatzea… Haatik gaztetan, ez nekien zer lanbide eginen nuen, eta kasualitatez irratian lan egiteko proposamenak ukan ditut, eta horrela hasi naiz. Gaur egun, irratigintza lanbide bat baino gehiago pasio bat da niretzat.
• Zaletasun honek lan haundia ematen dizu...
Asteburuko emankizunak euskaraz eguerditan, ortziral goizeko saioa frantsesez hiru astero. Beste kronika batzuk ere bai: erreportajeak, agendak, b.a.-ba du basque delako kronika, nun hitz zonbaitzu erakasten diedan euskara mintzo ez duteneri… Baina denbora erdiz naizenez, ordezkapen ainitz egiten ditut beharra badelarik. Uste dut France Bleu irratiko emankizun guziak bederen aldi batez aurkeztu ditudala.
• Iparraldeko bi mintzairetan ongi moldatzen zara...
Biziki interesgarria da. Bi hizkuntza erabiltzea beti aberasgarria izaten da. Niretzat aski naturala da, eguneroko bizian erabiltzen ditudan bi hizkuntzak baitira. Hori dela eta, euskarak frantsesak baino toki murritzagoa du antenan, eta pertsonalki nahiko nuke presentzia gehiago ukan dezan, batez ere goizetan: baditugu bizpahiru minutako kronikak euskaraz, frantses emankizunen barnean, eta horrelakoak biziki interesgarriak dira euskara ez dakien publikoak hizkuntza entzuten baitu. Lotura bat egiten dugu euskaldun eta ez euskaldunen artean… eta lotura hunek, zubi hunek, euskararen hedapena aitzinaraz dezakeela sinisten dut.
• Zoin da lanaren alderik onena? Eta txarrena?
Alderik onenak jendea eta Euskal Herria ezagutzea dira. Lanean hasi naizen geroztik, gauza ainitz ikasi eta deskubritu dut! Hortan da plazer haundiena niretzat. Alde txarrak gutti dira. Batzutan, tratatu behar ditugun gaiak edo egin behar ditugun elgarrizketak inposatuak zaizkigu eta ez dira baitezpada gustukoenak… Halere, plazer ainitz hartu dut Larraineko Monzon pastoralari buruz erreportaje bat egiterakoan. Lekukotasun interesgarri eta hunkigarriak biltzeaz gain, musika eta kantu ederrekin beztitu nituen elgarrizketak, eta nire iduriko irratian erreportajeek behar dute soinu bizia... Bestalde, kronika bat egin nuen atzerrian bizi diren euskaldun batzueri buruz, telefonoz. Potreta batzuk ahaztezinak geldituko dira, horien artean, Jose Goitia Kuban bizi den argazkilaria, edota Laurent Dufourg, sortzez kanboarra, hunek Estatu Batuetan izugarriko fortuna egin du pertsona ezagunen ile-mozlea bilakatuz! Luxuan bizi izanki ere, pertsona sinplea da.
• Eta elkarrizketatu nahi zenukeen norbait?
Amets bat baizik ez bada ere, Steven Spielberg! Ez baitezpada egin dituen film oso arrakastatsuengatik, baizik eta laster aterako den Tintin filmaren aipatzeko! Tintin Hergé-ren komikiaren zale amorratua naiz.
BI HIZKUNTZEKIN LANEAN
«Lotura bat egiten dugu euskaldun eta ez euskaldunen artean... Eta lotura hunek euskararen hedapena aitzinaraz dezakeela sinisten dut»
Andde IROSBEHERE Larresoroko irratilaria