Arkupeak elkarteko zuzendaritza batzorde berria lehen pausoak ematen hasia da. Orain arteko bidearekin segitu nahi du, baina aldaketak egin eta proiektu berriak ere atera nahi ditu aitzinera. Bertzeak bertze, estatutuak eguneratu nahi dira, komisioak eratu dituzte, zerbitzu berriak eskaini nahi dira, baita diru iturri berriak bilatu ere.
Ilusioz eta gogoz hasi du ibilbide berria Arkupeak elkarteko zuzendaritza berriak. Uda honetan hasiak dira lanean eta ez zaie proiekturik falta. Hauek dira zuzendaritza batzordea osatzen duten aurpegi berriak: Pedro Bañares doneztebarra lehendakaria da, Ezkurrako Fernando Etxeberria lehendakariordea, Mª Isabel Mitxeltorena doneztebarra idazkaria, Jose Oronoz iruritarra diruzaina eta bortz bokalak hauek: Juana Mª Bertiz donamariarra, Pakita Mikelarena legasarra, Gemma Gamio doneztebarra, Jose Mª Irazoki beratarra eta Jose Luis Legarra doneztebarra.
Proiektu andana dituzte eskuartean. Aldaketak egin nahi dituzte, baina argi dute orain arte Arkupeak-ek egin duen bidea ere mantendu nahi dutela. Guztiengana ailegatzea da helburua. Izan ere, aski eremu zabalean bizi diren 3.100 bat bazkide ditu Arkupeak-ek, Urdazubitik Donibane Lohizuneraino eta Leitzalderaino. Eta eskualde zabalaz gain, denetariko bazkideak. Zuzendaritzatik adierazi digutenez, «Arkupeak-en adin eta egoera desberdinetako pertsona aunitz gaude. Denak diferenteak gara eta interes diferenteekin. Badira 60-65 urtekoak, sasoi onean, eta adinean aurrerago joanak ere bai. Denentzat ailegatzeko ekintzak prestatu nahi ditugu».
Estatutuak eta funtzionamendua
Hasteko, estatutuak dira eguneratu nahi dituztenak eta horren barne, elkartea zertarako den zehaztu nahi dute: «zer den elkartea, zertarako eta nola antolatu ikusi beharko da», diote zuzendaritza berriko kideek. Gisa berean, lau urtetik behin zuzendaritza batzordea berritzeko hauteskundeak egitea ere proposatu dute.
Bañares, Etxeberria, Irazoki eta Legarrak izanen dute estatutuak eguneratzeko ardura eta ondotik, zuzendaritzako gainerakoen aitzinean aurkeztuko dituzte proposamenak. Herrietako ordezkariei bidaliko zaie gero eta ondotik, Nafarroako Gobernuari, behin betiko onartua izan dadin.
Funtzionamendua ahalik eta eraginkorrena izan dadin, komisioak bereizi dituzte: batzorde ekonomikoa alde batetik, bertzeak bertze, aurrekontuez, dirulaguntzez eta finantza erakundeez arduratzeko. Bidaien batzordea dago bertzetik; instituzio eta hedabideekin harremanak hirugarrenik, eta gizarte eta kultur garapena azkenik. Gainera, urritik aitzinera administrari bat kontratatuko da lanaldi erdian eta garbitzaile bat ere hartu da lanaldi erdian.
Kudeaketari dagokionean, afiliazioa eta bankuko kontuaren helbideratzea ezinbertzekotzat jo dituzte. «Orain arte, bazkideek delegatuei ematen zieten kuota edo bidaien dirua. Honek diruzainari ematen zion eta honek bankura eraman. Hori baino errazagoa da zuzenean bankutik kobratzea», diote zuzendaritzakoek. Honen harira, erran, kuota sei eurotik zortzi eurotara igo dela.
Herrietako delegatuen lanaz ere ez dira atzendu. 41 dira guztira eta urteetan «etxez etxe lan haundia» egin dutela azpimarratzea nahi du zuzendaritzak. Lana erraztu nahi diete, baina hemendik aitzinera ere euren partehatzea ezinbertzekoa izanen da.
Zerbitzu berriak
Zerbitzu berriak ere eskaini nahi dituzte. Hasteko, webgune bat martxan paratzeko asmoa dute eta Internetek ematen dituen abantailak ere baliatu nahi dituzte. Baina teknologia berriak aunitzetan arazo bihurtzen dira adin jakin bateko jendearentzat eta horri ere aterabidea eman nahi zaio, informatika eta Internet bazkideei hurbilduz.
Sasoian dauden eta mendirako afizioa duten bazkideak ere badirela aprobetxatuz, mendi taldea sortu nahi dute elkartearen barne. Eta bertzetik, urteetan egiten diren bidaiez gain, berriak antolatzeko asmoa ere badute. Bidaien berri emateko modua ere aldatu eginen da. Orain arte, antolatzen zen bidaia bakoitzeko informazio-orri bana bidaltzen zen bazkideei. Orain, aldiz, lauzpasei hilabetetik behin boletin informatiboa kaleratuko da eta han agertuko dira bidaia guztien xehetasunak.
Gizarte alorra ere landu nahi dute. «Gure adinekoek ez dute oraingo gazteek izan duten aukera izan eskolara edo unibertsitatera joateko, baina jakinmina badute. Horregatik, kultur jarduerak antolatu nahi ditugu, euskararen erabilera indartu, hitzaldiak, tailerrak eta ikastaroak antolatu...». Baina badituzte egitasmo gehiago ere: etxera jatekoa edo erosketak eramateko zerbitzua, fisioterapia, podologia, ezinduentzako aulki, ohe edo gisako tresnak... eskaini nahi dira, baita aholkularitza zerbitzua ere, gai fiskalen inguruan bazkideei laguntza emateko: testamentuak, donazioak, pentsioak, jubilazioak... Baina hori boluntarioen laguntzarekin egin nahi da eta horretarako, kolaborazioa eskatu dute: «Zonaldeko jende helduaren artean, bertzeei laguntzen ahal dien aunitz dago, beharrak dituztenei esku bat botaz edo edozein gairekin lagunduz». Horren harira, zera adierazi dute, «zain gaude jendeak Arkupeak-etik zer espero duen jakiteko, baina zerbait eskaintzeko prest dagoen jendea ere pozik hartuko dugu».
Bainuetxearen proposamena
Arkupeak elkarteko bazkideei eskaintza bereziak eginen zaizkiela erranez, eskaintzak egin dizkie Elgorriagako bainuetxeak. Akordioa lortu dela erran izan bada ere, zuzendaritzatik azaldu digutenez, oraindik ez dago deus erabakia.
Autofinantzazioa
Dirulaguntzak ere jeitsi egin zaizkie: 2010ean guztira 54.613,30 euro hartu ziren Gobernutik eta Nafarroako Kutxa Fundaziotik eta 2011rako 38.595,75 euro aurreikusi dira. Dena den, diru sarrerak jeitsi izanari aurre egiteko ideiak ere badituzte. Fundazioa sortzea, adibidez. Izan ere, fundazio bat eratuz gero, enpresek edo partikularrek dirua emateko aukera edukiko lukete eta horrekin zergak arinduak izanen lituzke. «Onuradunak zertan aterako garen ikusi behar da», diote.
Lanerako gogoa badute, proiektuak ere ugari. Erronka, orain, proiektu horiek denak aitzinera eramatea izanen da. «Arkupeak-ek orain arte ‘bidaiak eta bazkariak’ kontzeptua izan du, baina guretzat hori baino zerbait gehiago da».
EMAN ETA HARTU
«Zain gaude jendeak Arkupeak-etik zer espero duen jakiteko, baina zerbait eskaintzeko prest dagoen jendea ere pozik hartuko genuke»
Zuzendaritza Batzordea
Aste honetan Madrilera joanen dira eta bi aste barru Benidormera
Duela bi aste Arantzazun eta Loiolako basilikan izan ziren. Asteazken honetan, Lezora joatekoak ziren eta ortziral honetan, irailak 16, Madril aldera joanen dira. Arkupeak-eko bazkideak ez daude geldirik egoteko eta elkartean hainbertzerako garrantzia duten bidaiak antolatuz segitu nahi du zuzendaritza berriak. Irailaren 16tik 23ra Madril eta inguruak ezagutzen ibiliko dira. Irailaren 29tik urriaren 13ra, berriz, Benidormen eginen dute egonaldia eta urriaren 30ean Lodosa eta Lizarrara joanen dira.