Arkupeak elkarteak antolatutako mus txapelketaren azken fasea jokatu zen irailaren 9an, joan den ortziralean Elgorriagako balnearioan. Herri gehienetan, aitzinetik jokatu ziren hasierako faseak eta horietan garaile suertatukoak bildu ziren Elgorriagan joan den ortziralean, 32 bikote.
Txapelketa goizeko 10:00etan hasi zen eta arratsaldeko 15:00 arte aritu ziren enbidoka eta ordagoka, hori bai, eguerdian atsedenaldia hartu zuten hamaiketakorako.
Azkenean, Doneztebeko Joakin Illarregik eta Jesus Mangadok lortu zuten txapela, eta Bixente Jauregi eta Mikel Bildarraz leitzarrak suertatu ziren azpitxapeldun. Hirugarren postua Timoteo Iguzkiagirre eta Santiago Iparragirrerentzat izan zen eta laugarrena, Tomas Goia eta Eusebio Gonzalezentzat.
Behin txapelketa bukatuta, bazkari ederra izan zuten bainuetxean bertan eta bazkalondoan sari banaketa egin zen.