Herri kirol saioz betetako hilabetea dator. Izan ere, larunbat honetan, irailak 3, hasita Euskal Herriko hainbat bazterretan Euskal Herriko zein Nafarroako txapelak erabakiko dira. Larunbatean, Euskal Herriko lasto jasotze, txinga eramate (gizonezkoak) eta arpana txapelketak jokatuko dira Donostian eta Nafarroako txokor biltze txapelketa Berriozarren. Igandean, hilak 4, Leitzan Euskal Herriko Aizkolari Gazteen Txapelketa jokatuko da eta II. Mailako Euskal Herriko Aizkolari txapelketako kanporaketa Zestoan (Gipuzkoa). Hilaren 10ean Zazpi Herrialdeen Arteko Txapelketa izanen da Legution (Araba) eta 18an Euskal Herriko I. mailako Aizkolari txapelketaren kanporaketa Arbizun (Nafarroa). Nafarroako II. mailako aizkolari txapelketaren finala irailaren 25ean jokatuko da Uharte-Iruñean. Arkaitz Olano (Leitza), Julen Kañamares (Berriozar), Joxeantonio Loiarte (Zubieta), Xabier Mindegia (Beintza Labaien) eta Juan Joxe Erdozia (Etxarri Aranatz) lehiatuko dira. Eskualdeko aizkolariei dagokienez, Raul Castro (Urroz), Patxi Mindegia (Zubieta), Asier Pellejero (Areso) eta Jexux Etxeberria (Beintza-Labaien) finaletik kanpo gelditu dira.