Nafarroako Gobernuko Toki Administrazio Departamentuak behin betiko onarpena eman dio Baztan, Bertizarana, Bortziriak eta Malerrekako hondakinak hartuko dituen transferentzia planta Donezteben eraikitzeko proiektuari. Horretarako, proiektuaren aurka aurkeztutako lau alegazioak bertan behera utzi ditu. Udala, egurrarekin lanean aritzen den herriko enpresa bat eta bi partikular izan ziren alegazioak aurkeztu zituztenak, baina Toki Administrazio Departamentuak ez ditu onartu.
Oteiza auzoan eraikiko da hondakinen tratamenturako transferentzia planta, 22,3 milioi euroko inbertsioa eginez. 2012rako martxan egotea aurreikusia dago.