Herritarren arteko aizkora apustua izan da festetako ekitaldirik jendetsuena

Trikitixa doinuek alaitutako afariarekin hasi ziren aurtengo festak abuztuaren 14an. Biharamun goizean, Meza Nagusia izan zen eta arra­tsaldean, berriz, hiru herritarren artean aizkora apustua jokatu zen: Martin, Moises eta Jabier aritu ziren nor baino nor eta lehenengoa nagusitu zen, pare bat aizkora golpeko aldearekin. Adineko batzuen arabera, herritarrek jokatutako azken proba duela 45 urte egin zen, bost lagunen artean.
Ekitaldi arrakasta­tsua izan zen, jende asko hurbildu baitzen ikustera, eta seguru aski festetako ekimenik jende­tsuena izan zen. Musikarik ere ez zen falta izan eta biharamunean he­rriko gazteek herri kirol saioa egin zuten. Afari eder batekin eta ondorengo festarekin eman zioten egunari bukaera.
Azken egunean he­rri bazkaria egin zen eta hemen 92 lagun elkartu ziren. Aurten lehenengo aldiz, Udalak 65 urtetik gorakoak gonbidatu zituen, eta hemendik aurrera ere hala egitea espero dugu.
Baina ia ez da inor ohartzen horrelako ekitaldien atzean herritar askoren lana dagoela. Herri bazkaria, adibidez, Jose Luisek antolatua egiten da, bost lagunen laguntzarekin.
Ciprianoren lanak ere aipamena merezi du, aizkora probetarako egurrak berak presta­tzen baititu. Zuhaitzak bota, zuzentu, bere erre­molkean frontoira eka­rri eta behar den bezala­ jarri... Berak egiten du, Migel, Txuma eta aba­rren laguntza du.
Eta herri kirolak pres­tatzen dituztenetaz ere ezin gara ahaztu, eta ondotik arazorik gabe dantza egiteko frontoia garbitzen dutenetaz ere ez. Guztion izenean, zorionak eta eskerrik beroenak.