Festa partehartzaileak izan dira aurtengo Amabirjinak

Aurtengo Amabirjinetatik zerbait nabarmen­tzekotan, beharbada, jendearen parte-hartzea izan daiteke, eta bereziki­ herriko jendearena. Antolatutako ekitaldietan erantzun ona eman bai­tu­te herritarrek.
Hortaz aparte, egitarautik kanpo ere izan dira gauzak, eta esker­tze­koa da jendearen borondatea. Ho­rren adibide da Petrise­ne­ko hiru anaiek Haurren Egunean egindakoa: suzko zezenarekin, toreroa eta asto gainean pikatzailea han atera ziren.
Nabarmentzekoa da, arbola altxatzea eta botatzea bereziak izan direla aurten. Lehengo estilo zaharrean lekutu zen plazatik: arpanekin eta gisako tresnekin bota zuten, eta autoz edo traktorez eraman beharrean, ekarri bezala, bizkarrean hartuta lekutu zuten.
Amabirjin Egunean, Meza Nagusiaren ondotik, duela 40 urte he­rritik kanpora ateratzen hasi ziren joaldunak izan ziren protagonistak. 1971­ean Errenteriko Madalenetara joan zirenak eta urte berean, festetan meza­ ondotik joaldunen desfilea egiten hasi zirenak omendu ziren.
Haurren Egunean, Gu­raso Elkarteak Eskola ttikietan hezkun­tza duina eskatuz egindako boletoen zoz­keta egin zen. Lehenengo saria (589 zen­bakia) Edurne Santesteban herritarraren­tzat izan zen; Altxunea erretegian bi lagunendako afaria irabazi zuen. Bigarren saria (345) Oihana Mindegia aurtiztarrak eraman zuen, etxeko pro­duktuen saskia. Le­rro hauen bidez, gurasoek eskerrak eman nahi izan dizkie jendeari.
Gainerakoan, asteak joan eta etorri, en­tsaioetan ibili ondotik, festetako azken egunean gure dantzariek eskainitako emanaldia ere polita izan zen.