Aurreko alean esan bezala Basaburua Ttikiko herriak elkartzen saiatu zen Gobernadore Zibila. Guztiek udal bakarra osatuz eta Eratsun hiriburu bezala proposatuz. Udal artxiboan berriro begiratuz 1924ko urriaren 1ean, Ezkurrako udala erabakiaren kontra azaldu zen. Artxiboko aktek diotenez beste bi saiakera egin ziren Basaburua Ttikiko hiru herriak udal bakarrean elkartzeko. Ezkurrakoak ez zuen horren beharrik ikusten langileen gastuak ordaintzeko nahiko baliabide bazituelako: idazkaria, aguazila, medikua… eta elkartzeak ez zuela ekonomikoki hobekuntzarik ekarriko adierazi zuen.
Harritzekoa dena Ezkurra, Eratsun eta Saldiasi, Areso elkartzeko saiakera. 1984ko martxoaren 30ean elkartu ziren udalak bilera egiteko eta ezezkoa eman zuten idazkariarentzat ezinekoa zelako lau herrietaz behar bezala arduratzea argudiatuz. Kontuan hartu beharrekoa zen Aresoren urruntasuna, neguko elurteek asko zailtzen baitzuten bertara iristea. Eta ez zuen inongo onura ez ekonomiko ez eta funtzionalik ere ematen.
Bizilagunen eta udaletxearen arteko istiluen iturri izan dira askotan iralekuak. Nafarroako Gobernuak lur komunalak direla esaten du, bizilagunek euren jabetza bermatzen duten dokumentuak aurkeztu izan dituzten arren.
Argi dagoena gaztainadien jabetza da. Udala, 1965eko urtarrilaren 18an elkartu zen eta gaztainadien jabetza pribatua onartu zuten, bai Ezkurrako udalak eta baita Diputazioak ere.
Eliza eta udalaren arteko harremana
Gaur egun apaizgintzan krisia bada ere, gogoratu behar da 60ko hamarkadan Ezkurran lau meza ematen zirela. Herriko Etxeak lehen lau presbiteroei irratiak oparitu zizkien. Horrez gain pilota partidak antolatu zituen eta musika txistulariekin, herritarren parte hartzea eta laguntza eskatuz.
Eliza eta udalaren arteko erlazio ona begi bistakoa zen. 1955ean batera antolatu baitzituzten erreguak. Hiru egunez segidan egin zituzten, garaiko lehorteagatik.
Hurrengo urtean aurkakoa gertatu zen, ekaina hilabete euritsua izan zen eta berriz ere prozesio eta erreguak antolatu zituzten eguraldiak hobera egin zezan.
Emaitza onak izan zituzten erreguek, eguraldiak onera egin baitzuen. Udalak elizari erreguak egiteari uzteko eskatu zion eta berriz eguraldi txarrak bueltatuz gero jarriko zirela harremanetan.