Udaberriko martxari eutsi eta langabetu kopurua pixkanaka jausten ari da eskualdean uda hasiera honetan ere. 1.046 langabetu zeuden ekain hondarrean Doneztebeko Enplegu Bulegoan izena emanak, maiatzean baino 64 guttiago (%5,77ko jautsiera, Nafarroako %2,51ko banaz bertzekoaren gainetik eta bulego guzien artean handiena). Ekainean 481 kontratu gauzatu dira Doneztebeko Enplegu Bulegoaren bitartez, baina horietatik 35 bakarrik izan dira mugagabeak.
Lan arloei dagokienez, zerbitzuen arloak jarraitzen du langabe gehien izaten. Halere, ekainean 671tik 644ra jautsi da langabetu kopurua. Industria arloan ere jautsi egin da 192tik 167ra. Eraikuntzan ere jautsi da, maiatzeko 144tik 141era. Nekazaritzan, ere bi lagun guttiago daude lanik gabe, 21, eta aitzinetik lanik egin ez dutenen artean ere, 73 lagun daude langabezian, maiatzean baino 7 guttiago. Adin eta sexuari dagokionez, bakar bakarrik 25 urte baino gehiagoko emakumeen artean egin du goiti langabeziak. Emakume gazteagoetan, aldiz, 56tik 38ra jautsi da langabetu kopurua ekainean.