Hamargarren urtez eginen da Ramon Latasa aizkora sariketa. Abuztuaren 11n izanen da 19:00etatik aitzinera. Aurten gainera lehen aldiz herriko besten barrenean jokatuko da. Sei aizkolarik hartuko dute parte hiru bikotetan banaturik: Nazabal-Etxeberria, Larretxea-Atutxa II eta Lopez-Arrospide. Lau proba egin beharko dituzte sei aizkolariek. Lehenengo bi kanaerdiko enbor bana moztu beharko dute, ondotik zutikako kanaerdiko bat moztu beharko dute eta 45 ontzako etzandako bi enbor. Hirugarren proba banakakoa izanen dute, bakoitzak lau kanaerdiko ebaki beharko ditu. Bukatzeko berriz ere bikoteka lau kana erdiko eta lau 60 ontzako moztu beharko dituzte.
Gazteen sariketak V. edizioa izanen du eta hemen ere sei aizkolari ariko dira bikoteka. Oihan Larretxea-Arkaitz Olano, Ugaitz Mugerza-Aratz Mugerza eta Ander Erasun-Ruben Saralegi. Gazteek hiru proba egin beharko dituzte. Lehendabizi bikoteka 45 ontzako zutikako enborra eta etzandako bi ebaki beharko dituzte. Bigarren proba banakakoa izanen dute eta hemen 45 ontzako launa enbor moztu beharko dituzte. Bukatzeko berriz ere bikoteka lau kanaerdiko eta 60 ontzako bi enbor ebaki beharko dituzte.
Aurten lehen aldiz eginen dute gaztetxoen mailako sariketa. Hiru aizkolari gazte izanen dira parte hartzen: Mikel Zabaleta, Iker Vicente eta Joxean Etxeberria. Hauek banaka hartuko dute parte eta bi proba egin beharko dituzte. Leheneik bakoitzak 45 ontzako enbor bat moztu beharko du eta ondoren 45 ontzako hiruna enbor moztu beharko dituzte.