Uztailaren 31n ospatuko da Altxata kultur elkarteren 20. urteurrena. Goizetik trikitilari eta txistulariek kalejira eginen dute meza aitzinetik. Ondotik Pello Apezetxeari omenaldia eginen zaio plazan. Gero, herri bazkaria izanen da frontoian. Bazkalondoan Euskal Kantuak kantatuz alaituko da giroa. honetarako aitzineko bi asteetan txartelak salgai egonen dira Elutsa, Herriko ostatua edo 677031920 telefonoan (Edurne).
Arratsaldean I. Argazki lehiaketa eginen da. Etxalarri lotutako edozein gairi buruzko azken hogei urteotako argazkiak aurkez daitezke Kultur Etxeko Altxataren buzoian sartuz edo Axun Maia edo Maite Goienetxeri eskura emanez uztailaren 25a baino lehen. Entregatzen den sobrean ongi zehaztu beharko dira argazkilariaren izen abizenak eta kontakturako telefonoa. Argazkiaren neurriak 10x15ekoa izan behar du gutienez eta pertsona bakoitzeko 5 argazki aurkez daitezke. Argazkiaren balorazioaren %50a epaimahaiak eginen badu ere, gainerakoa herritarren esku izanen da. Horretarako goizeko ekitaldiaren ondotik ordu erdi batez botoa emateko aukera izanen da; baita arratsaldeko 17:00etatik 17:30era ere. Sari banaketa 18:30ean izanen da. Lehenbiziko saria 2 lagunentzako landa etxe batean asteburuko egonaldia; bigarrena, bi lagunentzako afaria; eta hirugarren saski eder bat. Zalantza argitzeko deitu 677031920ra.