Krisia kamioi lasterketetara ere ailegatu da. Horren ondorioz, Javier Mariezkurrena doneztebarra gidari duen Truck Navarra taldea lasterketa guttiagotan parte hartzen ari da aurten. Baina ekainaren 18ko asteburuan Nogaron (Frantzia) taldearendako bigarren karrera zenean, garaipen historikoa lortu zuten Europako txapelketarako baliagarria zen proba lehen aldiz irabazita. Ez hori bakarrik: estatu mailako talde pribatu batek garaipena lortzen duen lehen aldia da eta estatuko kamioi gidarien artean ere, Europako txapelketako karrera bat irabazten duen bigarrena da Mariezkurrena.
Lehenbiziko lasterketarako, lortzen arras zaila dagoen superpolean sartzea lortu zuen. 10. denborarik onena egin zuen eta parrillan postu horretan atera zen lehen karreran. 2003an Europako txapeldun izan en Stuart Olivier gidariarekin lehiatu ondotik, 10. akitu zuen lehen lasterketa. Bigarrenean ere 10. abiatu zen eta baina ez zuen lortu aitzineratzea eta postu berean sailkatu zen.
Igandeko sailkatze txandan berriz ere superpolean sartzea lortu zuen, 9. denborarik onenarekin. Postu horretan abiatu eta karrera eder baten ondotik, 8. akitu zuen. Hala, laugarren karreran lehen postuan ateratzeko aukera izan zuen.
Asteburuko azken karreran, lehen postuan abiatu eta irteera bikain baten ondotik, lehenbiziko bihurgunean lasterketa buruan sartzea lortu zuen, helmugara lehen postuan sartuz. Garaipen historikoa izan zen, «honekin amesten genuen, baina ez genuen uste inoiz ailegatuko zenik, arras polita eta haundia da», aipatu digute Truck Navarra taldetik.
Europako txapelketak bost proba eginak ditu dagoeneko, baina Mariezkurrenak bitan hartu du parte. Halere, Europako kamioi lasterketa txapelketan hamabigarren postuan kokatu da.