Ekainaren 28an ospatu zuten Arkupeak Elkarteko kideek 25. urteurreneko besta handia Donezteben. 1986an lau lagunek sortu zuten Arkupeak elkartea Donezteben eta 25 urte pasata, Nafarroako mendialdeko eta Gipuzkoako Bidasoaldeko 45 herrietako 3.000 bazkide baino gehiago ditu. Felipe Ganboa izan da 25 urteetan lehendakari, eta azken ospakizunean kargua utzi eta bere lekua Pedro Bañaresek hartu zuen. Halere, erne zegoen Ganboa eta oroitzapen berezia izan zuen Joakin Goikoetxea, ospitalean zegoen Berako delegatuarekin.
Goizean meza izan zuten San Pedro parrokian. Meza ondotik aurten Urrezko Ezteiak egin dituzten senar emazteak eta 85 urte bete edo beteko dituzten ohorezko bazkideak omendu zituzten.
Urrezko Ezteiak eta ohorezko bazkideak
Urrezko Ezteiak bete dituzten senar-emazteak hauek dira: Jose Saizar eta Teresa Telletxea (Areso); Agustin Dagerre eta Asuncion Otxoteko (Bera); Jose Arrieta eta Mª Jesus Pueyo (Elgorriaga); Juan Marisko eta Mª Karmen Etxebertz (Erratzu); Jaime Lopez eta Luisa Arenaz (Irun) eta Juan Irazoki eta Mercedes Arburua (Zugarramurdi). Denek bere oroigarria jaso zuten eta argazkiak atera zituzten senideekin. Ohorezko bazkide izendatu zituztenak hauek izan ziren: Amaiurko Bernardo Rekalde, Arantzako Inaxi Iparragirre eta Felix Jorajuria, Arraiozko Mercedes Juanikotena, Berako Miguel Artieda, Matias Irazoki, Maritxu Martikorena, Felisa Maia, Damaso Rozas eta Lino Telletxea, Elizondoko Miguel Nuñez, Eratsungo Mikaela Barberia, Etxalarko Martin Indaburu, Igantziko Miguel Dorronsoro, Irungo Martin Andueza, Leitzako Bernardino Aierdi, Joakina Azpiroz, Hilaria Etxeberria, Demetrio Salbarredi eta Katalina Villabona, Lesakako Mercedes Zabalozuazola, Oizko Juana Anso, Sunbillako Francisca Agesta, Francisca Iriarte eta Maria Zubieta eta Urdazubiko Isabel Jaimerena. Hauek ere oroigarriak jaso eta argazkiak atera zituzten.
Kirolari handiei omenaldia
Luntxaren ondotik kirol erakustaldia egin zen eta aizkolariek eta harrijasotzaileek, tartean Iñaki Perurenak, lan ederra egin zuten. Kirolari beteranoei omenaldia egin zieten gero: Juan Inazio Retegi, Julian Retegi eta Elias Pierola pilotariei eta Mikel Mindegia aizkolariari. Oroigarriak jaso ondotik, beraien emazteekin eta Arkupeak elkarteko ordezkariekin argazkiak atera zituzten. Ondotik kiroldegian bazkaria egin zuten eta Jalisko Band taldearekin euskal abestien kantaldia eta dantzaldia ere izan zuten.
Ospakizun eguna borobiltzeko, bertze besta bati hasiera eman zioten erretiratuek. Izan ere, Felipe Ganboak Doneztebeko besten txupinazoa bota zuen.