Leihoetan oihalak, bidean belarrak... Horrela esnatu zen herria Bestaberri egunean. Herritarrek ederki apaindu zituzten bazterrak prozesioa egiteko eta parte hartzera animatu zen jendea. Urteetan galdua izan den eta aurten berreskuratu den ohiturak erantzun ona izan zuen.
Zortzi gazta aurkeztu ziren Udalak Bestaberri egun arratsalderako antolatu zuen gazta lehiaketara eta horien artean, Elizagaineko Lurdes Elizalderena izan zen aukeratua. Bi lagunendako afaria eraman zuen sari gisa. Bigarren sailkatua, berriz, Xapakobordako Engraxi Urriza izan zen eta bi botil ardo jaso zituen.
Parte hartu zuten zortziak hauek izan ziren: Azkuntzulutako baserria, Parazelaitako baserria, Olaseneko borda, Iriarteko borda, Seroko borda, Xapakoborda, Elizagaina eta Martuzenea. Lerro hauen bidez, Udalak eskerrak eman nahi izan dizkie parte hartzeagatik. Aurkeztutako gaztak ondotik egin zen berendurako aprobetxatu ziren eta honetan ere, herritarrek ongi erantzun zuten. Ilunabarrean, musika izan zen Aierrik taldearekin plazan.