Mizel Zamora (Senpere) eskusoinua, tronpeta eta tronboiarekin; Peio Iziaga (Ezpeleta) ahotsa; Ortzi Hegoas (Miarritze) bateriarekin; Txomin Dhers (Urruña) teklatuarekin; Amaiur Coscarat (Miarritze) baxuarekin; Patxi Bidart (Baigorri) gaita eta saxofoiarekin; Maitena Beheran (Donibane Lohizune) ahotsa; eta Pierre Balacey (Luhuso) eta Sebastien Sedes (Makea) gitarrarekin. Lagun talde honek osatzen du Xutik musika taldea. 2008an sortu zen eta duela gutti euren lehendabiziko diskoa kaleratu du: Mukaki Zpirit.
Xutik taldea Zpeiz Mukaki taldearen bidetik sortua da, ezta?
Bai, Xutik taldearen oinarria Zpeiz Mukaki da. Zpeiz Mukaki taldearekin 2006an hasi ginen, herriz herri, Euskal Herri osoan ibiliz, elektro-txaranga batekin, zortzi dantzari ero eta alaitsurekin ondoan eskoziar gona bat soinean. Freskura apur bat ekarri nahi ginuen euskal dantza tradizionalei, bereziki musika aldatuz. Rock, punk eta ska musika estiloekin dantzarazten genituen gure inguruak eta gure lagun dantzariak. Gure artean harremanak sortu dira eta nahi ginuen eszena tokiko abentura bat hasi, hortik sortu da Xutik 2008 urte bukaeran. Hainbertze urtez bertsioak jo eta gero, gure kantuak egin nahi genituen. Sorkuntza lana ezezaguna genuen baina hala ere, proiektu hortan sartu gira.
Zein helbururekin sortu zenuten taldea?
Zpeiz Mukakiren izpirituarekin, erran nahi da gure publikoa dantzara eta mugimendura eraman nahi dugula. Beti atxikiz gogoan gure aldarriak eta gure ama hizkuntza.
Ipar Euskal Herriko hainbat txokotako kideak bildu zarete...
Lehenik, musika talde bat izan aitzin, lagun talde bat gira. Horrek gure artean lotzen gaitu. Gero, gure nahia jendea dantzaraztea da, mugiaraztea erritmo goxo batzuekin batzuetan, bortitzagoekin bertzeetan. Gure ama hizkuntza eta gure aldarriak adieraziz kontzerturo.
Orain artekoaren zein balantze eginen zenuke?
Kontzertu anitz egin ditugu. Ekainaren 21ean Musikaren besta kari, Baionan egin genuen kontzertua gure 58garrena zen. Eszena eta kalea gure mundu da. Plazer haundia hartzen dugu taularen gainean. Gehienbat Iparraldean egin ditugu kontzertuak momentuko (hirulaurdenak), baina geroz eta gehiago Hegoaldean joko dugu.
Nolako diskoa da Mukaki Zpirit?
Denetako musika estiloak badira disko horretan, baina beti musika alaia. Erran nahi dut gure soinuetan kumbia goxo batetik (Has bizi), ska-ra (Galdua), rock gogor batetik pasatzean (Nun) eta disko/pop estiloa (Badoa) ageri dira. Gure musika oso eklektikoa da eta denei zuzendua. Bertzetik, eguneroko bizian hartutako gai desberdinak aipatzen ditugu, hunkitzen gaituzten gaiak dira, errealitate politikoa, kulturala, besta...
Zergatik izen hori?
Oso zaila da esplikatzea, baina erranen nuke pasibotasuna haustea dela. Bazterrak harrotzea, umorea, dantza eta harremanak sortuz. Alaitasuna eta umore ona hedatzea.
Zer moduzko harrera izaten ari da diskoa?
Orain arte diskoaren inguruan izan ditugun kritikekin gustura gelditu gira. Batzuek gogoko, bertzeek guttiago, baina kritika guziek aitzinera pausoak eginarazten dizkigute.
Nolako uda heldu zaizue?
Agian beroa eta alaia! Zuzenekoetan hasiak gira eta poliki-poliki kontzertuen lotzen ari gira.
Nola ikusten duzue etorkizuna?
Gerora begira ez dugu aurreikuspegirik. Poliki-poliki bagoaz. Ideia eta proiektu anitz ditugu eta talde bezala, bakoitza aztertzen eta eztabaidatzen dugu. Lehenago erran bezala, musikariak izan aurretik lagunak gira eta etorkizunera begira lehenik gure laguntasun hori babestu eta indartu nahi dugu. Musikari dagokionez, gure diskoa zuzenean aurkeztu ondotik, ea bigarren batean murgiltzen giren!
DISKO BERRIA
«Denetako musika estiloak badira Mukaki Zpirit diskoan, baina beti musika alaia. Gure soinuetan kumbia goxo batetik, ska-ra, rock gogor batetik pasatzean eta disko/pop estiloa ageri dira. Gure musika oso eklektikoa da eta denei zuzendua. Eguneroko bizian hartutako gai desberdinak aipatzen ditugu eta hunkitzen gaituzten gaiak dira, errealitate politikoa, kulturala, besta...»