Ekainaren 4an egin zen Urdazubiko Kontrabandisten Lasterketan Jandari Said frantziarra gailendu zen. 15,8 kilometroko ibilbidea osatzeko ordubete, 2 minutu eta 58 segundoko denbora behar izan zuen. Bigarren postua, Bizkaian bizi den Walter Becerra venezuelarrarentzat izan zen (01: 04:28) eta hirugarrena Aragoiko Luis Hernandorentzat (01:05:39). Fernando Etxegarai beratarra laugarren izan zen (01:05:43) eta Iñigo Lasaga etxalartarra bederatzigarren (01:12:20).
Sailkapen buruan ageri diren kirolarien izenek eta egindako denborek erakusten dute aurtengoan partehartzaileen maila bikaina izan dela, izan ere, lehenbiziko sailkatuarentzat 500 euroko saria baitzegoen (Montxo Ostatua Saria), 250 eurokoa bigarrenarentzat, 150 eurokoa hirugarrenarentzat, 100 eurokoa laugarrenarentzat eta 50 eurokoa bosgarrenarentzat. 7,8 kilometroko tarteko helmugan, Irigoienea Saria ere Saidentzat izan zen.
63 lagunek eman zuten izena, baina 54 atera ziren eta guztiek lortu zuten ibilbidea osatzea.
Iruritako krosa
Iruritako hirugarren herri lasterketa ekainaren 5ean jokatu zen, Salbatore besten barne. Gizasemeen artean, Elizondoko Alberto Barberena nagusitu zen, 25 minutu eta 16 segundoko denborarekin. Bigarren Iñaki Telletxea izan zen eta Patxi Cobo hirugarren. 26 gizonezkok egin zuten zazpi kilometro eta erdiko ibilbidea.
Emakumeetan, Iraizozko Vanesa Patxa izan zen bizkorrena, 19 minutu eta 40 segunduko denborarekin. Bere ondotik, Laura Sola eta Maika Ariztegi iturendarra helmugaratu ziren. Sei emakumek egin zuten bortz kilometroko itzulia. Helduen lasterketaren aitzinetik, 82 neska-mutikok parte hartu zuten haurrendako egindako lasterketan.