Mitxitxi marriau, katuek jain hau, biher edo gaur, kor, kor, kor, kor... Gure inguruan ezaguna den eta haur ttikiekin jostatzeko erabiltzen den mitxitxi marriau leloaren haritik, izen bereko Mitxitxi marriau ipuina kaleratu du Begoña Durrutyk. Aita Donostiak 1950ean desagertua zegoen ipuinaren aztarnak bildu zituen Bidasoko herrietan eta beranduago Jose Mari Satrustegi Luzaide inguruan eta gehienbat Sakanan aritu zen lan berean. Bildutakoarekin Mitoa herri-kantu eta ipuinetan ikerketa lana idatzi zuen. Horixe erabili du, hain zuzen, Durrutyk bere lan berria egiteko. Erein argitaletxearekin kaleratu du eta bere hitzetan, «ipuin klasikoa» da.