Ekainaren 11z geroztik, Miguel Mari Irigoien da alkate berria. Egun horretan hartu zuten kargua bai berak eta bai sei zinegotziek ere. Herri Taldeak eta Etxalarko Independenteek hiruna zinegotzi zituzten eta Etxalar Aintzinerat taldeak bakarra. Azken honek txurian bozkatu zuen eta bertze bi taldeek euren zerrendaburuei. Beraz, Herri Taldeak 45 boto gehiago zituenez, lehendik 18 urtez alkate izan den Migel Mari Irigoienek hartu zuen aginte makila.
LAN BANAKETA
Dagoeneko lanean hasia da udal berria. Hala, udal batzarrak hilabeteko azken ortzegunetan egitea erabaki dute, 18:00etan. Komisioak ere ortzegunetan eginen dira, lehenbiziko ortzegunean kulturakoa, bigarrenean mendikoa eta hirugarrenean hirigintza eta zerbitzuak. Beti 18:00etan eta jendeari irekiak izanen dira. Arlo bakoitzeko arduradunak ere zehaztu dira. Hirigintza eta zerbitzuetan Jose Mª Maia eta Arantxa Zubieta izanen dira, kulturan Maite Irisarri, mendian Miguel Mª Irigoien eta Pedro Galarregi. Eskola kontseiluan Udalaren ordezkaria Maite Irisarri izanen da (botoduna) eta Maria Mitxelena laguntzailea. Okindegiaz alkatea eta Maria Mitxelena arduratuko dira. Euskara Mankomunitatea ere alkatearen esku gelditu da eta UEMA Ignacio Atondoren esku. Gizarte Zerbitzu eta Hiri Hondakinen Mankomunitateetako presidentea alkatea da.