Eusko Label Banakako Aizkolarien Txapelketako finalak jokatuko dira igande honetan, ekainak 12, Azpeitiko Izarraitz pilotalekuan, 12:00etatik aitzinera. Hiru kategorietako finalak jokatuko dira, 15 urtez azpikoena, 19 urtez azpikoena eta Urrezko Mailakoa. 23 urtez beheitikoek joan den ekainaren 5ean jokatzekoa zuten finala.
15 urtez azpikoetan, Iker Vicente (Otsagabia, 1997) eta Mikel Zabaleta (Leitza, 1997) ariko dira aurrez-aurre. 19 urtez azpikoetan, Eneko Otaño (Beizama, 1994) eta Eneko Saralegi (Leitza, 1993) ariko dira.
23 urtez azpikoetan, Oihan Larretxeak (Bera, 1990) eta Aitzol Atutxa II.ak (Dima, 1988) jokatzekoa zuten ekainaren 5ean baina lerro hauek idazterakoan oraindik ez genuen emaitzaren berririk. Egun horretan egitekoa zen, Urrezko Mailako 3. eta 4. posturako lehia ere, Iñaki Azurmendi (Arriaran) eta Jon Rekondoren (Leitza, 1985) artean. Igande honetako azken lehian, Urrezko Mailan, Aitzol Atutxa II.a eta Juan Jose Lopez Azpilkueta (Lezaun) aterako dira txapelaren bila.