Azken partida galdu arren, Udaberriko Erremonte Torneoko txapela Xanti Uterga eta Julen San Migel doneztebarrentzat izan da. Txapelketaren berezitasuna partidak frontoi motzean eta luzean jokatu direla da eta lehenbiziko lehian lortutako abantailari esker lortu dute txapela Doneztebekoek. Txapeldunordeak, berriz, Matxin III.a eta Miguel Mari Urrutia saldiastarra izan dira.
Maiatzaren 15ean frontoi motzeko finala jokatu zuten Donezteben eta 19 tantoko aldearekin irabazi zuten Utergak eta San Migelek, 21-40. Abantaila hori baliatu zuten doneztebarrek, maiatzaren 21ean Hernaniko Galarreta pilotalekuan jokatu zen frontoi luzeko partidan. Matxin III.a eta saldiastarra nagusitu ziren, 38-40ko markagailuarekin, baina Utergak eta San Migelek aitzinetik lortua zuten errenta horri esker txapela Doneztebera eraman zuten.