Joan den maiatzaren 28an iragan den eguna arrakastatsua izan da. Zazpi probintziak bildu dituen txapelketa eguzkipean iragan da. Lehiak gogorrak izan dira, baina kiroltasun osoz jokatuak.
Gasteizeko Gaztedi taldeak ezustea sortu zuen finalerako sailkatuz. Finalean Donapauleko 'bluiak' taldearen kontra lehiatu zuten. Partida 10-10eko berdinketarekin bukatu zen, baina Donapaulek entsegu gehiago sartu baitzituen Baxe Nafarrak izan ziren Euskal Herriko lehen txapeldunak. Taldeen portaera goraipatzekoa da.
Sailkapena honelakoa da: 1.Donapaule, 2.Gasteiz, 3.Sara, 4.Hernani, 5.Azkaine, 6.Mendikota, 7.Getxo, 8. Baztan.
Egun hori, Integrazio Batzordearen aldeko ekimena ere izan zen. Iluntzean, xapito zoragarrian 500 lagun bildu zituen zikiroko irabaziak elkartearen alde izan ziren. Kuxkuxtu txarangak zintzur bustitzea alaitu zuen. Ondotik , Xutik eta DJ Balporesek gorputzak dantzan ezarri zituzten.
Oroitzapenetik bidaiarat ikusgarria integrazio batzordearen alde
Ahalmen urriagoko haurren eskolatzearen alde egiten duen elkarteak, bertze sustenguak errezibitu ditu. Izan ere, aitzineko aleetan maiz aipatu dugun Oroitzapenetik bidaiarat ikusgarriaren antolatzaileek Euskal Herriko errugbi txapelketa aprobetxatu nahi izan dute elkarteko kide den Dominique Idiarti 6.700 euroko txekea emaiteko. Bultzatzaile eta antolatzaile izan den Zazpiak Bat elkarteak, Olhain ikastolaren eta Etxola gaztetxearen laguntza ukan du. Milesker denei!