Heldu den uztailaren 22an, hiru hamarkada beteko dira Ahetzeko Mattinen boza eta irria isildu zirela. Bertsulari hunen izena eta izana gogoratzeko omenaldia prestatzen ari dira bere sorterrian Herriko Etxeko arduradunak, Euskal Kultur Erakundea eta Bertsularien Lagunak elkartea. Mattin zenak lotura hertsia zuen Senpererekin maiz etortzen baitzen hunat kantatzerat, Ibarrungo eta Helbarrungo bestetarat, bertzeak bertze, Xalbadorrekin zonbait aldiz. Adineko senpertar guziek gogoan dute oraino aheztarrarekin egin zituzten irriak Sarako besten karietarat konparazione. Bere andrea Mari, duela sei urte zendua hura ere, senpertarra zen eta biziki atxikia zen sorterriari. Ez da dudarik herritar frango joanen dela beraz auzo herrirat, Ahetzerat uztailaren 10ean, omenaldi egunean.
Egitarau zabala
Huna hemen omenaldi egun horren egitaraua.
10:00etan, meza Jarraiki koralarekin, Euskal Irratietan zabaldua izanen dena zuzenean. Ondotik, Mattinen oroitarriaren aitzinean, Agur Jaunak abestuko da lehenik eta Ahetzeko auzapezaren hitz hartzea. Segidan, Jose Mari Iriondo, Mattin ongi ezagutu zuen kazetariak hitzaldia eskainiko du.
Mattinen bizia laburbiltzen duen plaka baten agertzea eginen da eta gero Aurreskua dantzatuko da. Txomin Ezpondaren bertsuek ere bere lekua izanen dute ekitaldian. Aperitifa izanen da herriko plazan.
Gero, bazkaria izanen da Ahetzeko Hiriartea ostatuan. Bazkariaren prezioa 23 eurokoa da eta izenak eman behar dira lehenbailehen deituz 05 59 41 95 22 telefono zenbakira.
Bazkalondoan, 16:00etan, bertsu saioa eginen da Ahetzeko eskolan Michel Aire Xalbador, Odei Barroso, Ekhi Erremundeguy, Jose Luis Gorrotxategi, Patxi Iriart, eta Imanol Lazkanorekin. Gai emailea Joana Itzaina izanen da.