Langabe kopurua pixkanaka jausten ari da eskualdean udaberri honetan. 1.110 langabe zeuden maiatz hondarrean Doneztebeko Enplegu Bulegoan izena emanak, apirilean baino 38 guttiago (%3,31ko jautsiera). Maiatzean 385 kontratu egin ziren Doneztebeko Enplegu Bulegoaren bitartez eta horietatik 46 izan ziren mugagabeak. Adina eta sexuari dagokionez, 25 urtez goitiko gizasemeen artean beheiti egin du langabeziak (499tik 471ra), eta adin tarte horretako emakumeen artean 521etik 495era jautsi da. 25 urtez beheitikoen artean, aldiz, goiti egin du. Adin tarte horretako emakumeetan 50etik 56ra eta gizasemeetan, 78tik 88ra igo da. Lan arloei dagokienez, zerbitzuen arloak jarraitzen du langabe gehien izaten, nahiz eta maiatzean 696tik 671ra jautsi den.