Haur kopuru eskasagatik, duela 16 urte itxi zen Zubietako eskola. Geroztik, zuzenean Doneztebera joan beharrean, etxetik hurbilago duten Iturengo eskolara joateko aukera izan dute Zubietan. Orduko ikuskariak hala baimendu zuen eta guraso bakoitzak erabaki izan du Doneztebera ala Iturenera eraman. Doneztebera joateko autobusa badute; aldiz, Iturenera norberak eraman behar ditu haurrak.
Azken 11 ikasturteetan, Haur Hezkuntzak bi tutore izan ditu haur kopuruak hala eskatuta. Ikasturte berriari begira, aldiz, ilun dago kontua. 16 ikasle izanen dira Haur Hezkuntzan eta 14 ikasletik gora bigarren tutorea tokatzen da. Hezkuntza Departamentuak, ordea, bakarra tokatzen zaiela esan du. Eta arrazoia, bere hitzetan, «Zubietako haurrek Donezteben matrikulatu behar dutela».
Aurrematrikulazioa
Otsailean egin zuten neska-mutikoen gurasoek hurrengo ikasturterako aurrematrikulazioa. Sei ikasle berri agertu ziren: hiru zubietar eta hiru iturendar. Guztira Haur Hezkuntzan 16 ikasle izanda, «urtero bezala, bi tutore egokituko zirela pentsatu genuen», azaldu digu Begoña Ilzarbe Haur Hezkuntzako tutoreak. Gainera, arazorik gabe onartu ziren aurrematrikulazioak Gobernuan. Zuzendaria gerora konturatu zen plaza bakarra aurreikusia zegoela. «Iaz gauza bera pasatu zen eta akats bat izan zen. Segituan zuzendu zuten. Aurten ere, akatsa zelakoan, zuzendariak ikuskariari deitu eta honek akats bat izanen zela erantzun zion», dio Ilzarbek. Baina zuzentzen ez zutela ikusita, Eskolarizazio Batzordekoekin solastu zen: «zubietarrak ez dituztela kontuan hartu esan zioten, Doneztebera joatea dagokielakoz. Hortaz, Haur Hezkuntzan 16 ikasle izan ordez, 13 izanen lirateke eta 13rekin tutore bakarra».
Batera eta bestera jo zuen eskolako zuzendariak bi tutore eskatuz, baina alferrik. Guraso Elkartearengana ere joan zen eta hau Sortzen Ikasbatuaz-eko abokatuarengana: «abokatuak aurrematrikulazioak onartuak daudela eta arazorik ez zela egonen esan zigun. Arazoa administrazioarena zela», kontatu digu Anuska Garrote zubietako guraso eta Iturengo eskolako Guraso Elkarteko lehendakariak. Arartekoarengana eta ikuskariarengana ere jo zuten gurasoek eta azken honek «16 urtez kapritxo bat izan dugula erantzun zigun, eta ez eskubide bat, kontent egoten ahal ginela». Foru Aginduak dioenaz baliatzen dira horretarako. Horren arabera, mapa eskolarra kontuan hartuz, zubietarrek Doneztebera joan behar dute. 16 urtetan Iturenera joatea baimendu dute, baina hori ez dago inon idatzia eta «orain legea aplikatzea erabaki dutela diote», adierazi du irakasleak. Hortik haratago, kontua da epez kanpo eman dutela abisua Gobernutik, aurrematrikulazioak onartuak daudelako eta berriki arte gurasoek ez dutelako deusen berririk izan.
Baremazioa
Eginahalak eta bi egin dituzte 2011/2012 ikasturtean bi tutore egon daitezen. Eskola, Guraso Elkartea, Ituren eta Zubietako Udalak, Eskola Kontseilua... Denak bat egin eta denak mugitu dira. Baina erantzun onik ez.
Bigarren tutorea onartzeko itxaropenik ez, eta eskolatik beste proposamen bat egin zen: «musika irakaslea lanaldi erdiarekin aurreikusia dago eta lanaldi osora luzatzeko proposatu genion ikuskariari, saio batzuk Haur Hekuntzan egiteko –dio irakasleak–. Hasieran ongi hartu zuten asmoa baina biharamunean ezezkoa eman ziguten. Ateak itxi eta baremazioa egiteko agindu digute». Plazak baino eskaera gehiago dagoenean egiten da baremazioa. Kasu honetan, 13 iturendar daude eta 14koa da muga. Zubietatik dauden hiru eskaerei erantzuteko, plaza bat dago. Gurasoak, euren aldetik, ez daude geldirik egoteko eta «borrokan segituko» dutela baieztatu digu Garrotek.
Afera beltz ikusi arren, euren eskumenak defendatzen segitzen dute: zubietarrek eskolarik hurbilenera joateko eskubidea dutela eta haur eta irakasleek hezkuntza kalitatea bermatzeko bi tutore izateko eskubidea dutela.
AZKEN ERANTZUNA
«Ateak itxi dizkigute eta baremazioa egiteko agindu digute»
Begoña ILZARBE
Haur Hezkuntzako tutorea
IKUSKARIAK ESANA
«16 urtez kapritxo bat izan dugula esan digu ikuskariak»
Anuska GARROTE
Guraso Elkarteko lehendakaria