Igerilekua ekainaren 15etik irailaren 15era bitarte egonen da irekia, 11:00etatik 20:00etara. Lan egiteko bortz lagunek eman zuten izena eta horien artean hiru aukeratu dira. Denek sorosle akuatiko titulua zeukatenez, esperientzia eta bertze titulazioak kontuan hartu dira eta ondorioz, hiru hauek hartuko dute igerilekua: Miren Mangado Oianarte doneztebarrak, Ioritz Mitxeltorena Amunarriz elizondarrak eta Alix Gereka Amunarriz iturendarrak.
Aldaketa ttiki bat egon da aukeratzeko moduan. Orain arte Udalak muga bat jarrita, interesatuek proiektu bat entregatzen zuten eta horren arabera ematen zieten ala ez. Orain, berriz, hiru hauek kontratatuko dituzte sorosle konbenioaren barrenean turnoka, beti ere igerilekuan bi egon daitezen. Dagozkien oporrak izanen dituzte baita igande bat libre ere. Bonoak Nafarroako eta Rural kutxetan egonen dira salgai.
Prezioak
• 6 urte arteko haurrek dohainik izanen dute.
• 6 urtetik 12 urtera: hiruhilabetekoa 20 euro, hilabetekoa 15,50 euro eta egunerokoa 3 euro.
• 12tik 18 urtera: hiruhilabetekoa 26,50 euro, hilabetekoa 22,50 euro eta egunerokoa 3,50 euro.
• 18 urtetik aurrerakoek: hiruhilabetekoa 39 euro, hilabetekoa 28 euro eta egunerokoa 4,50 euro.
Igeriketako ikastaroen tarifak eta orduak igerilekuko arduradunek paratuko dituzte.