Sortzez Donamariakoa den arren, azken bi urteotan Itsasun (Lapurdi) bizi da Amelia Lizasoain eta Itsasuko Arrokagarai ikastolako gurasoa da. Ikastola berria da, Kanbokoa ttiki gelditu zenean zabaldua. Halere, oraindik ikastola izanen den eraikina obratan dago, eta Seaskak errentan hartutako etxe batean ematen dituzte eskolak. Pozik eta ilusioz ari dira lanean gurasoak, baina Frantziako Gobernuaren laguntzarik gabe, gastu haundiari egin behar diote aitzin. Egoera zein den zehatzago kontatu dio TTIPI-TTAPAri.
Ikastola berria da Itsasukoa. Azaldu historia...
Kanboko ikastolak sobera haur zituen eta orduan hasi ginen mugitzen. Bertze ikastola bat irekitzekotan, non ireki aztertu zen eta haur gehienak Itsasukoak zirela eta, Itsasun egitea erabaki zen. Ezpeleta, Luhuso eta Itsasuko gurasoak bildu eta Arrokagarai ikastola elkartea sortu genuen 2008an, Itsasun ikastola bat eraikitzeko asmoarekin. 2010eko irailean egin genuen ama ikastolara lehen sartzea 17 haurrekin. Halere, orain dauden tokia ez da behin betiko ikastola, Seaskak errentan hartutako etxe batean baitaude eta denak gela bakar batean. Ikastola izanen den eraikin berriko obrak hasiak dira eta hurrengo urtean sartuko dira haurrak hor. SIVOM herri elkargoaren erabakiari esker sartuko dira haurrak eraikin berrian, Udalak herriko bertze eskolen ondoan utzitako lur eremu batean.
Zaila da ikastola aitzinera ateratzea?
Lan haundia egin behar da. Seaskatik obrak antolatu eta finantzatzen dira baina ikastola barreneko materialak, altzariak,pintatu eta hori dena guk egin behar dugu gure kontura. Ikastola berri bat irekitzeari lotutako gastuez gain, ikastolako laguntzailearen (ASEM) postua mantentzeko dirua ere behar dugu. Lehenbiziko urtean izan genuen postu horretarako laguntza baina aurten guk ordaindu behar dugu, eta 15.000 euroko gastua da. Horregatik diru sartze kanpaina bat ireki genuen. Otsailean kantaldi bat antolatu genuen, martxoan kontzertu bat eta maiatzean besta herrikoi bat. Nafarroaren Egunean ere lanean aritu ginen. Ekainean Irukasko lasterketan lan egitea pentsatzen ari gara eta uztailean ea posible den Ezpeletako lasterketan aritzea. Ahal dugun toki guztietan lan egiten saiatzen gara. Txekez edo transferentziaz diruz laguntzeko ere eskatzen diogu jendeari. 20 guraso gara eta beti dirua biltzeko lanean ari gara, baina badugu gogoa eta ilusioa.
Frantziako Hezkuntza Ministerioak 2009an Seaskarekin akordioa sinatu zuen irakasleak esleitzeko...
Bai, baina irakaslegoa murriztu egin dute. Egoera hagitz larria da, Gobernuak ez baditu irakasleak ematen, Seaskak ordaindu behar dituelako eta Seaskak ez du horretarako nahiko diru. Momentuz, 17 irakasle ordaintzen ditu eta ezin du gehiago eta gurasook nahiko lan badugu bertzela ere. Gure itxaropen bakarra Eusko Jaurlaritza eta egiten dugun lana dira. Azken urtean ez da Jaurlaritzatik deus sartu, eta orain erran digute baietz, joan den urtean eman ez zutena emanen dutela. Eta Frantziako Gobernutik ez da deus heldu. Ikastola guztietan 3.000 bat haur izanen dira eta laguntzarik gabe zaila da, baina ez dugu etsiko.
Lehen maila irekitzeko asmoa ere baduzue...
Heldu den urtean lehen maila ireki nahi dugu. Ez bada irekitzen, Kanboko ikastolatik aurten etorri diren ikasleek berriz ikastolaz aldatu beharko dute lehen urtea egiteko. Irekiz gero, 30 haurrekin hasiko dugu ikasturtea eta urtean zehar, bederatzi haur ttiki sartuko dira. Bi zikloetako irakaskuntza ziurtatzeko bertze irakasle bat behar da.
Zer eskatuko zenuke?
Jendeari Lapurdi ere hemen dagoela erranen nioke. Denak euskaldunak gara, guk ere ikastolan eta etxean euskaraz egiten dugu eta gogo eta ilusio berarekin ari gara lanean. Gutaz ez ahazteko eskatuko nuke eta gu Hegoaldera joaten garen bezala, eurek ere honat etortzeko. Denak ongi etorriak izanen dira.
IRAKASLEAK
«Frantziako Gobernuak ez baditu irakasleak ematen, Seaskak ordaindu behar ditu eta Seaskak ez du nahiko diru»
GASTU HAUNDIA
Gastu haundiei egin behar diete aitzin Ipar Euskal Herriko ikastolek. Itsasun, ikastola berria martxan paratzearen gastuez gain, irakasle laguntzailea gurasoek ordaindu behar dute. Informazio gehiagorako: itsasuko-ikastola@orange.fr