Joan den asteburuan 14 eta 18 urte artekoan Josu Sanjurjo lesakarra nagusitu ondotik, larunbat honetan, ekainaren 4ean, 14 urte arteko Nafarroako Eskolarteko bertsolari txapelketaren finala jokatuko da, goizeko 11:30etik aitzinera Larraintzarreko ikastetxeko aretoan. Nafarroako Bertsozale Elkarteak antolatu du ekitaldia, Ultzamako Euskara Zerbitzuaren laguntzarekin.
Eskualdeko bertsolari ugari
Guzira 12 bertsolari ariko dira eta horien artean eskualdeko gaztetxoek ordezkaritza zabala izanen dute. Joan den urteko txapelduna, Maddalen Lopez lesakarra, Doneztebeko Beatriz Maritorena, Igantziko Enaitz Telletxea eta Maiana Sein eta Leitzako bortz ordezkari, Joanes Ilarregi, Beñat Altzelai, Saioa Mateorena, Xabat Ilarregi eta Oier Altzelai ariko dira kantari. Beraiekin batera, Beriozarko Unai Muro eta Manez Mailharin eta Iruñeko Amaiur Gindeo izanen dira lehenbiziko fasean. 4 oinak emanda bertso bana, gaia emanda bertso bana eta hitza emanda bertso bana osatu beharko dute.
Lehen faseko galbahe horretatik sei gaztetxo pasatuko dira bigarren fasera eta horretan gaia emanda bertso bana eta zortziko ttikian bina bertso kantatu beharko dituzte. Iker Gorosterrazu iturendarra izanen da aurkezlea eta Nerea Bruño eta Xabier Terrerosek osatuko dute epaimahaia.