Bertizko Partzuergo Turistikoak antolatzen duen Pilotaren Ibilbidearen barne, aurten lehenbiziko aldiz, Laxoaren Eguna eginen da larunbat honetan, maiatzak 28. Eta kirol honekin duen lotura dela eta, Oiz aukeratuko dute horretarako.
17:00etan laxoa partida jokatuko da. Baztan-Bidasoko txapelketako lehia izanen da eta gainera, jokatzen ari diren bitartean jendearendako azalpenak emanen dira, jokoaren arau eta ezaugarrien berri emanez. Araudia hain berezia izanik, publikoari orri bat ere banatuko zaie azalpenekin.
Ondotik, laxoari buruzko erakusketa inauguratuko da. Laxoa elkartearen panel bilduma eta materiala ere ikusgai egonen da eta horren inguruan xehetasunak ere kontatuko dira.
Akitzeko, inguruan ohikoak diren produktuak dastatzeko aukera izanen da, eta bazterrak alaitzeko musika ere bai. Aipatu, aldi berean, herrian nabarmentzeko artisauak daudenez, artisau erakusketa ere eginen dela.
Partzuergotik azaldu dutenez, «jende asko hurbiltzea espero dugu, hainbertze plaza haunditan jokatu den antzinako eta gaur egun gure eskualdean bakarrik jokatzen den jokoa ikustera».