Ituren, Saldias, Eratsun eta Beintza-Labaiengo Lehen Hezkuntzako 5. eta 6. mailako hamabortz ikaslek eta bi irakasle laguntzailek Gran Canaria irlara joanen dira maiatzaren 22tik 28ra, Eskola Ibiltariak egitasmoaren barrenean.
Iturengo eskolako bederatzi ikasle (Hodei, Ane, Zuriñe, Duba, Gurutze, Iratxe, Andoni, William eta Mikele), Saldiasko bi (Julen eta Ibai), Beintza-Labaiengo hiru (Aintzane, Mireia eta Javier) eta Eratsungo Jasone joanen dira, irakasle laguntzaile Saldiasko Koldo eta Iturengo Mixel dituztela.
Maiatzaren 22an abiatuko dira hegazkinez Bilbotik Gran Canariako Las Palmas hiriburura. Han, Madril eta Cuencako bi ikastetxetako bertze 30 ikaslerekin eta lau irakaslerekin elkartu eta 45 ikaslez osaturiko talde bakar bat izanen da astebetez.
Bidaia hau Escuelas viajeras-Eskola Ibiltariak egitasmoaren barrenean dago. Espainiako Hezkuntza eta Zientzia Ministerioak eta erkidego autonomoetako Hezkuntza Departamentuek antolatzen dute, Espainiako komunitate bat ezagutu eta, modu berean, bidaia lagunak izanen diren bertze bi erkidegoetako ikasleekin harremanak sustatzea eta esperientziak elkartrukatzea dira helburu nagusiak, Mixel Gereka irakasleak aipatu digunez. Eskolako curriculumetako gaiekin loturik doaz bertan jorratuko dituzten edukiak, baina bidaia bat denez, ezaugarri ludikoak eta aisialdikoak ere ez dituzte bazterrean utziko, noski. Beraz, ikasleak hasiak dira atzerako kontua eginez eta egunak kontatzen hasi dira dagoeneko, ilusioz beteak eta pozarren pozez.