Ez behin eta ez bi aldiz. Dagoeneko zortzi aldiz eskuratu du Lizun gaztandegiak Idiazabal Gaztaren kalitate eta erregulartasun saria: azken zazpi urteotan jarraian ekarri du etxera diploma eta horiez gain, 1997an lortu zuen lehenbizikoa.
Apirilaren 28an egin zen Ordiziako XVII. Artzain Eguna eta orduan zabaldu zen Euskal Autonomia Erkidegoan Idiazabal Gaztaren denboraldi berria. Han jaso zuen Arkaitz Vicentek saria. Maiatzaren 4an, berriz, Nafarroako denboraldia abiatu zen Lizun gaztandegikoek eta han ere hartu zuten saria.
Erregulartasunaren saria emateko urte guztiko gaztak emandako maila hartzen da kontuan. Horretarako, urtean zehar hainbat probaketa egiten dira.
20.000 kilo gazta
Urtean 20.000 kilo gazta produzitzen ditu Lizun gaztandegiak eta inguruko artzainek emandako esnearekin egiten dute. Baserrian 100 ardi paratu berriak dituzte eta etorkizunean artaldea haunditzeko asmoa ere badute.