Bilduren helegitea onartuta, aurkeztutako talde guztiak hauteskundeetan izanen dira

Espainiako Auzitegi Konstituzionalak ain­tzat hartu du Bildu koali­zioak­ aurkeztutako babes helegitea, eta beraz, maiatzaren 22ko udal eta foru hauteskundeetan izanen da. Auzitegi Gorenak baliogabetu egin zituen Bildu­ren zerrendak, baina Konstituzionalak gibelera bota du Gorenaren ebazpena. Horrenber­tzez, eskualdean aur­kez­tu diren talde guztiek izanen dute hauteskundeetan parte hartzeko aukera. Aurkezten utzi izan ez baliote, airean gel­dituko litzateke Aran­tza, Goizueta eta Sunbi­llako udala, horietan Bildu baino ez baita aurkeztu. Horietaz gain­,­­ Bera, Lesaka, Bertiza­ra­na, Leitza eta Baztanen aurkeztu da Bildu.

Talde bakarra

Eskualdeko hamar herritan hautagaitza bakarra izanen dute hauteskunde hauetan eta hori da Arantza, Areso, Goizueta, Eratsun, Ezkurra, Igantzi, Oiz, Saldias, Sunbilla eta Zugarramurdiren kasua. Hortaz, hauteskundeen aitzinetik jakina da nola osatuko den udalba­tza. Arantzan Jaime Itu­rria izanen da alkatea, Areson Ur Alguero, Goizuetan Pablo Miranda, Igantzin Lourdes Ibarlu­zea eta Sunbillan Amets Inda. Eratsun, Ezkurra, Oiz, Saldias eta Zuga­rramurdin zerrendak irekiak dira eta maia­tzaren 22an jakinen da.

Zerrendarik ez

Sei herri dira zerrenda osatu ezinik gelditu direnak: Arano, Bein­tza-Labaien, Donamaria, Elgorriaga, Ituren eta ­Urroz. Urri aldera eginen den bigarren deialdiaren esperoan egon beharko dute, beraz. Horrez gain, kontzejuetako hau­tes­kundeak ere orain tokatzen dira, baina Berti­zaranan, ez Oieregin, ez Narbarten eta ez Legasan ere ez da hautagai­rik aurkeztu.

Bortz zerrenda

Zerrenda aukera zabalarekin ere badira udalerriak eta horixe da Baztan, Bera eta Etxa­larren gertatu dena. Bortz zerrenda baitituzte hautesleek. Laurekin daude Leitza eta Lesaka. Bi talde Bertizarana, Doneztebe, Urdazu­bi eta Zubietan izanen dituzte. Zubietan 2007­ko maiatzeko hauteskundeetan zerrendarik aurkeztu ez bazen ere, aldi honetan bi egin dira.

UPN-PPN-PSN

Hiru alderdiok lehen aldiz aurkeztu dute ze­rrenda herri batzuetan. Batzuetan herriko jendea badago ere, gehienetan kanpoko jendearekin osatu dituzte ze­rrenda osoak.

Epeak

Maiatzaren 6an zabaldu zen hauteskundeetako propaganda egiteko epea eta hilaren 20ra arte izanen da au­kera. Maiatzaren 22an 09:00etatik 20:00­etara egonen dira hautestontziak zabalik eta hortik aitzinera eginen dira zenbaketak. Postaz botoa eman nahi dutenek, berriz, maiatzaren 12a izanen dute eskaerak egiteko azken eguna eta 18rako bidalia izan beharko dute. Ekainaren 11n hartuko dute kargua alkate be­rriek.