Lehiaketetako presioa alde batera utzi eta kantuan gozatzeko aukera izan dute aurten ere neska-mutikoek Nafarroako Haur Kantari Jaialdiaren baitan.
Azkeneko saioa apirilaren 17an, igande goizean egin zen Iruñeko Gaiarre Antzokian, 700 entzuleren aitzinean.
Tartean, eskualdeko hainbat kantari izan ziren Gaiarren. Bortzirietako Bortziriak taldeak “Gogoak” kantatu zuen; Lekarozko Leire Onsalo bakarlariak “Ta orain ze?”; Iturengo Joare Taldeak “Lokaleko leihotik”; Goizuetako Ainhoa Zabaletak “Zu barik”; Leitzako Leire Erbitik “Hegaldi askea”; Berako Larun taldeak “Izar uxoa” eta Berako Axuriak taldeak “Min hau”. Denera, Nafarroa osotik etorritako 19 talde, bikote eta bakarlari aritu ziren oholtza gainetik kantari, denak 6 eta 16 urte arteko neska-mutikoekin osatuak.
Hain zuzen, nahiz eta txapelketa ez izan, Leire Erbitik eta Berako Jesusen Bihotza ikastetxeko 15 nexkek osatutako Larun taldeak eskuratu zuten ttikien kategorian Euskal Herriko jaialdietan parte hartzeko eskubidea. Gaztetxo mailan, izan zen berdintasunaren ondorioz, ez zen erabakirik eman.