Aiako Joxeramon Irureta Izeta II.ak (Gipuzkoa) irabazi zuen apirilaren 3an jokatu zen Etxauriko Antzinako Harriaren Txapelketa, Aimar Irigoienek iaz egindako marka –14 jasoaldi– hobetuz. 15 jasoaldi egin zituen aiarrak.
Baina Unai Bertiz sunbildarrak egindako lana ere azpimarratzeko modukoa da, bikain moldatu baitzen 136 kilo eta erdi dituen harri baldarraren. Bere marka hobetzea ere lortu zuen, hamar jasoaldi eginez. Eskualdeko bertze bi lagun aritu ziren lehian, Josetxo Urrutia leitzarra eta Xabier Ariztegi Santxin etxalartarra. Urrutiak bortz jasoldi egin zituen eta Ariztegik bi.