Seigarren urtez, martxoko azken igandean Sara Korrika Trail lasterketa iragan zen. Marka guziak hautsiz, 636 korrikalarik eman zuten izena proban eta horietatik 535ek lortu dute lasterketa bukatzea.
Itziarko Aitor Osa txirrindulari ohia izan zen bizkorrena eta 01:55:33ko denborarekin, Fernando Etxegaraik zeukan marka kasik hiru minututan hobetu zuen. Bigarren postua, Natitxua taldeko Imanol Goñirentzat izan zen (01:57:56) eta hirugarren egin zuen Leintzgain taldean ari den Fernando Etxegarai beratarrak (01:59:04). 25 kilometroko lasterkaldia bi ordu baino guttiagoan egin zuten bakarrak izan ziren. Leintzgain taldean ari den Iñigo Lasaga etxalartarra, bertzalde, 13. postuan sartu zen (02:09:17).
Emakumezkoen artean, Leintzgain Mendi taldeko Oihana Kortazar izan zen bizkorrena (02:27:29), bigarren Abadiñoko Oihana Aizkorbebeitia (02:30:34) izan zen eta podiuma Trintxerpeko Leire Elosegik osatu zuen (02:37:11).