Garaipenik gabe, baina ez gaizki aritu zelako. Raul Kastrok (29 urte) ezin izan zuen apirilaren 3an Zumarragako Xabier Zalduarekin (32 urte) Donezteben egina zuen desafioa irabazi.
Bakoitzak 18 kanaerdiko moztu behar izan zituen, eta denak Kastrok plazaratu zituen. Alde bakoitzak 3.000 euro jokatu zituen eta hasieratik dirua Zalduaren alde atera bazen ere, ez zen aunitzik jokatu.
Zumarragakoa hasieratik jarri zen aitzinetik, eta berehala hasi zen aldea ateratzen. Lehenbiziko enborrean 15 segundoko tartea egina zuen, eta bigarren enborrerako 33 segundoko tartea lortu zuen.
Ez zuen gaizki jokatu Kastrok, baina Zaldua indartsu agertu zen eta sasoian dagoela erakutsiz, gozatu egin zuen. Azkenean, lan guztiak akitzeko 44 minutu eta 43 segundo behar izan zituen gipuzkoarrak eta 53 minutu eta 4 segundo urroztarrak. Hala, bi apustu jokatu eta biak irabazi ditu, lehendik Ander Erasun menderatu baitzuen.
Apustuaren ondotik, Donamariako ostatuan bazkaldu zuten Kastrok eta lagunek, guztira 25 lagunek.