Sortzez Elgorriagakoa eta gaur egun Donezteben bizi den Bautista Iruruetak pilota gosez segitzen du. Duela urte batzuk desafioa luzatu zien bere adinekoak edo zaharragoak ziren pilotariei, partida bat jokatzeko. Betidanik gustuko izan du pilota eta Ameriketan bizitu zenean hainbat partida jokatu zituen zuriz. Baina Euskal Herrira bueltan, pilotarako grina ez zaio itzali eta oraingoan ere bere adinekoak edo zaharragoak diren Nafarroa, Gipuzkoa edo Bizkaiko pilotariei luzatu die erronka esku pilotan aritzeko. Muga eguna garbi dago: 1946ko apirilaren 18an jaio zen Bautista eta data hori edo lehenago jaiotako edozeinen kontra jokatzeko prest dago. Hortik aitzinerakoak bi pilotariek hitzartuko lituzkete; Etxalarko frontoia proposatu du berak, baina bertze edozeinetan ariko litzateke eta honelako apostuetan jokatzen ahal den dirua ere ez du zehaztu: «Nik pilotan jokatu nahi dut eta jendea mugitzeko dirua mugitzea ere ongi dago, baina bazkari bat ere jokatzen ahal dugu, hori guttienekoa da». Prest dagoenak 646 799828ra deitzea aski du. Bere helburua pilotan jokatzea da, «lehengo apostu moldea pilotan ere berreskuratu, frontoiko bizitasuna berreskuratzeko» eta badaki garai batean pilotari onak izandakoak badirela. Baina pena ematen dio pilotarako zaletasun eta grina adinarekin apaltzen doalako.